Ultimo dianan Aruba un biaha mas nos a wordo azota cu un tiramento di culpa riba otro di contrincantenan politico cu representacion den Parlamento. Enbes di realmente asumi responsabilidad pa loke NO a ser haci, ta keda “strooi” cu documentonan pa purba di “schuif” e culpa riba otro.
Si un minister of un parlamentario a tuma e molester di a tira bista den e denuncia cu mi persona a entrega dia 2 di december 2019 (tur minister y tur parlamentario tin un copia), nan por a saca afo cu esun cu realmente ta e culpabel te cu awe no a sikiera minimalisa e riesgo di un desaster ambiental, ta Otmar Oduber. Anto apoya pa gabinete Wever-Croes 1 y parlamentarionan di locual tin dos cu ta minister awor.
Mi ta haci uso di e oportunidad pa ilumina nan ignorancia y consecuentemente haci e trabou pa nan dor di publica parti di mi denuncia. Dia 18 di september 2018 caba e director di DOW a mustra minister Otmar Oduber riba e peliger eminente cu tin na e RWZI-nan. Esaki despues cu DOW y TNO a duna un presentacion amplio dia 8 di augustus 2018 na HENTER ministerraad. Den dicho reunion a mustra e urgencia y kico mester haci pa minimalisa e riesgo. E urgencia a wordo exponi hopi cla den e carta di 18 di september 2018. Den e carta a ser propone pa usa e “restfonds” di FDA pa sikiera haci cierto trabou na e RWZI pa evita un desaster (Lesa e carta di 18 di september 2018)!
Ora cu ta spera cu e minister enberdad haci uso di e “restfonds” cu e meta pa minimalisa e riesgo na e RWZI-nan, e minister ta SCOHE pa COMPLACE cu su sponsor. Den su carta di 5 di october 2018, Otmar Oduber ta haya Alzheimer selectivo y e no ta corda nada di e reunion di 8 di augustus 2018. Aki e wega ta cuminsa. Enbes cu e director asumi su responsabilidad pa e situacion di e RWZI-nan, e ta bay hunga e wega cu e minister di e tempo. Di carambola e minister ta instrui pa bin cu destaho bou man. Un destaho bou man cu a resulta den un “sjoemelmento” sin precedente!
E director y sra. Zaandam, kende awe ta traha cu nos Prome-Minister, ta bira nan cara otro banda pa di e manera aki Otmar Oduber por a comete e corupcion administrativo pa cu e compra di porkeria pa kima sludge, cadavernan y desperdicio medico. Hunto cu e carta aki nos ta pone e 3 cartanan pa mustra cu prueba visibel y palpabel cu en todo caso e problema na e RWZI-NAN ta desde 2010 te awe. Particularmente si tene na cuenta cu ningun parlamentario tin e curashi pa presenta un mocion pa DESAPROBA e maneho anti Aruba cu e gobierno POREDmep a hiba e.o. riba e tereno aki y tampoco pa cu e compra corupto di e incenirator chikito (porkeria) cu por cierto NO ta cumpli cu e bestek.
E parlamento nobo parce di a wordo instrui pa sigui e modus operandi di e parlamentonan anterior, esta sostene e gobierno sin mas, ehecuta omerta (silencio absoluto) pa no trese e coalicion den peliger y principalmente keda tira culpa riba otro pa no tin e responsabilidad pa desaproba e modus operandi di O.O. Un comportacion cu na final di cuenta lo nifica cu Aruba lo keda sufri y lo no trece e solucion duradero, sostenibel y pagabel pa e problema real di e RWZI-nan.
Lesa pa boso mes, cu ora awe parlamentarionan ta culpa AVP cu nan nunca a haci nada pa cu e problema aki, loke porcierto ta corecto, nos por mira cu Otmar Oduber tambe, bou di signatura di gobierno di MEP, tambe no a haci nada pa RWZI-nan. Manera nos amigo defunto Benny Nisbet ta bisa, “sin ta Tili, ta Tala, pero nos Aruba ta esun cu ta LALA”!
Miembro di Partido UPP
Booshi Wever
16 februari 2022