ORANJESTAD – Dialuna mainta, durante un conferencia di prensa di Gobierno di Aruba, Minister di Husticia y Asuntonan Social Sr. Rocco Tjon a elabora riba e proyectonan cu ta tumando luga pa nos instituto coreccional esta, KIA. Segun Minister Tjon, “ora ta trata un instituto coreccional, e maneho ta hopi “straight forward” pa motibo cu esaki ta wordo “geauditeerd” internacionalmente riba diferente aspectonan”. Ta trata aki di aspectonan di siguridad y higiena, e atencion medico, como tambe programanan cu por wordo brinda na e detenidonan, pa percura cu nan por re-integra y re-socialisa bek na un manera exitoso. Por ultimo, ta wak e organisacion den su totalidad, mirando cu ta e procesonan y e structura di e organisacion, ta locual ta haci’e posibel pa por atende cu tur e diferente aspectonan aki.
Segun Minister Tjon, den e prome tres lunanan, a aloca 1.5 miyon florin pa inversionnan cu mester tuma luga na KIA. Na mes momento, e Mandatario a expresa cu e ta lamentabel cu e informacion aki no ta yega na tur esnan cu ta traha na KIA, pues kier siguranan cu nan tin e atencion di Ministerio di Husticia y Asuntonan Social. E presupuesto di 1.5 miyon florin, ta netamente pa atende cu e diferente aspectonan. Hopi importante pa e parti di siguridad y higiena, ta e “combi-w.c.” pa e sala di recreo na KIA, cual ta causa hopi molester. Banda di esey, lo bay tin varios renobacion pa e parti di infrastructura. Lo bay renoba diferente departamento, manera IBA , “jeugd afdeling”, HVB y “straf afdeling”. Lo bay renoba tambe e “sluisdeuren” y lo introduci un “elektronisch sleutelbeheersysteem” esaki lo percura pa eleva e siguridad, y na mes momento tambe ta proteha e trahadonan.
Adicionalmente, a elabora tambe riba e parti di re-integracion y re-socialisacion di e detenidonan na un manera exitoso, cual lo wordo haci pa medio di diferente cursonan. Den luna di Maart lo bay sera un convenio cu Fundacion Enseñansa Pa Aruba (FEPA), pa di e forma aki garantisa cu structuralmente tin cursonan ta wordo brinda na tur nos detenidonan.
Por ultimo, e Mandatario a splica cu esakinan ta proyectonan specifico cu a wordo presupuesta caba, pues e fondonan ta disponibel. Ta papia di fondonan cu aña pasa a wordo aloca pa asina por realisa tur e diferente proyectonan aki. Unabes presupuesto 2022 wordo aproba, lo tin un suma aloca pa por sigui inverti den nos instituto coreccional.