ORANJESTAD – For di luna di mei 2020 gobierno di Hulanda a pone como condicion pa Aruba haya e di dos tranche di sosten di likides cu lo mester corta 60 miyon den gastonan di Algemene Ziektekosten Verzerkering (AZV). Un exigencia cu te awe Minister Dangui Oduber no ta di acuerdo cune y a pidi gobierno hulandes na varios ocasion pa reevalua e decision aki.
Gobierno di Hulanda te cu awe no kier reevalua e decision aki y ta keda para riba e instruccion cu nan a duna. AZV a haci diferente ehercicio y ta hopi dificil pa logra un recorte asina. Nos ta consciente cu tin reformanan cu mester tuma lugar pa keda garantisa e cobertura cu ta wordo ofreci actualmente.
Ministerio di Salud Publico a dicidi di institui un comision nacional di cuido na januari 2022 cu participacion di tur stakeholders den cuido pa asina nan yuda pensa kiko ta e mihor manera pa haci e reformanan den AZV. Den e comision nacional di cuido aki, e asociacion di dokternan di cas (HAVA) y tambe asociasion di specialistanan (ASHA), ta forma parti.
Nan a tene diferente sesion y a pensa riba alternativanan con pa percura pa reformanan tuma lugar. Despues di tur e sesionan e comision aki a traha un rapport cu nan recomendacionan cu a wordo presenta na Ministerio di Salud Publico y tambe a ser comparti cu Parlamento di Aruba.
Remarcabel di esaki ta e hecho cu e comision aki, segun nan raport, kier pone tur presion riba pueblo y nan mes no ta asumi hopi responsabilidad di por ehempel traha mas eficiente y asina tambe purba na juda mantene y/of reduci gastonan.
Un di nan recomendacionan tawata pa gobierno introduci un contribucion propio (eigen bijdrage) na spoed eisende hulp di 100 florin. No solamente a recomenda esaki sino a recomenda introduccion di eigen bijdrage riba diferente servicionan.
E discusion di e contribucion propio ta uno cu ya caba tin decision riba dje den pasado. Gabinete Mike Eman a tene varios dialogo social pa discuti esaki. Riba 31 di juli 2014 a firma un acuerdo cu sindicatonan y gremionan pa introduci un contribucion propio.
Minister Oduber a compronde cu HAVA y ASHA lo ta mandando un carta pa distancia nan mes di nan recomendacion pa contribicion propio. E proceso aki ta uno hopi serio y nos mester atende esaki cu tur seriedad.
