ORANJESTAD – Diahuebs mainta Minister di Turismo Sr. Dangui Oduber a duna un conferencia di prensa riba e tereno di Aruba Ports Authority (APA) caminda e proyecto di Port City (tereno caminda ta haci concierto) lo bay ta. E mandatario a cuminsa na bisa cu e ta hopi contento cu e maneho di APA, e la sigui bisa cu APA pa prome biaha a presenta un masterplan na Gobierno di Aruba caminda nan ta mustra nan vision y nan maneho. APA a presenta diferente desaroyo hopi interesante na Gobierno, desaroyonan cu lo bay stimula nos economia, crea cuponan di trabou, crea entrada pa APA y Gobierno.
Minister Dangui Oduber a anuncia e proyecto di dragamento (dredging) cu a cuminsa e siman aki den e awanan di APA, sigur un proyecto cu ta cuadra cu e vision y maneho di gobierno. E proyecto aki ya caba mester a cuminsa pero door di e pandemia y pa motibonan financiero cu esaki a trece pa APA e la ser posponi. E limpiesa di e canal aki ta hopi importante pa Aruba por acomoda e mega barco cruseronan. Esaki ta haci posibel pa Aruba por acomoda e “Oasis Class” di Royal Caribbean Cruise lines cu lo trece miles di turista crusero Aruba cu lo bay yuda e taxistanan, e tour operatornan, e restaurantnan y tiendanan cu otro palabra esaki lo bay crea un spin off economico den e area aki.
Minister Oduber a menciona cu manera ta conoci Gobierno di Aruba a decreta aña 2022 como aña di inversion y oportunidad. E proyecto aki ta bay tin un inversion di 1.6 miyon florin y lo tin un duracion di 2 siman. Durante e dragamento ta calcula cu lo drago masomenos 20 mil metro cubico di santo y sushi for di e canal. E trabounan aki ta un proyecto conhunto entre e grupo local di Varadero y un grupo Canades cu yama Ocean Group. Tambe a haci palabracionnan concreto cu Direktie Natuur & Milieu pa asina tene cuenta cu e parti di nos medio ambiente.
Turismo Crusero ta esun cu a keda mas afecta door di e pandemia, ta apenas den luna di juni 2021 Aruba a ricibi su prome crusero. E industria aki a cuminsa hopi slow y poko poko a cuminsa crese gradualmente. Den aña 2021 Aruba su turismo crusero a ricibi 136 mil pasahero den 96 calls y a recupera cu solamente 16% comprando esaki cu aña 2019 cu tabata un aña record caminda Aruba a ricibi 830 mil pashero. Pa aña 2022 a proyecta cu Aruba lo bay ricibi alrededor di 500 mil pasahero cu ta un recuperacion di 60% compara cu aña 2019. E pronostico aki ya caba a keda afecta un poco mirando cu den e prome 3 siman di luna di januari hopi calls a keda cancela door di e situacion di Omicron na Aruba.
Finalmente Minister Oduber a menciona cu APA lo bay sigui haci inversionan necesario pa sigui eleva nos turismo crusero. Turismo ta keda e driver di nos economia.
