ORANJESTAD – Awe mainta a tuma lugar e caso sumario cu Gobierno a cuminsa contra SIMAR y SEPA. Esaki relaciona cu e medida di 12.6 % cu Gobierno kier introduci y e sindicatonan a bisa cu nan ta bay desconta esaki for di oranan di trabao y lo bay traha menos.
ARUBA NATIVE por a compronde cu mr. Caster di Gobierno a mustra cu no por bin cu accion un dia pa otro. E ayudo di Hulanda a yuda Aruba den situacion di Covid y cu mester paga bek e ayudo. Promer Minister a anuncia cu lo mester paga bek. El a remarca riba e ponencia di sindicatonan cu ta haya cu e medida ta inhusto. Esaki na opinion di Gobierno no ta corecto. Esaki a wordo calcula debidamente. E hurista a bisa Hues cu tabatin diferente corespondencia entre Gobierno y sindicato riba otro alternativa. Na December 2021, sindicatonan a tene accion. Na Januari 2022 nan a notifica Gobierno cu lo traha di acuerdo e reduccion di 12.6 % cu ta 22 ora menos di trabao.
E hurista a remarca cu ningun momento e sindicatonan a notifica cu lo bay cuminsa traha mas laat. Esaki lo causa hopi intrankilidad den comunidad. E accion lo perhudica e studiantenan, mayornan cu ta hiba nan yiunan school, doñonan di trabao. Esaki no ta beneficia interes general. E hurista a bisa cu Gobierno kier sigui negocia cu sindicatonan.
Mr. Kock di Simar, na Maart 2020 Covid a afecta Aruba. A sera frontera y perhudica turismo. A surgi crisis y Gobierno a bay busca financiamento na Hulanda. A bisa cu gobernantenan a entrega 20 % y empleadonan di gobierno 12.6 % te cu December 2020. Hulanda a bisa cu mester baha gastonan den aparato gubernamental pero no tin e esfuerzo politico. Sindicatonan a kere cu ta te December 2020 pero no ta asina. Actual no por papia di situacion financiero dificil. No tin fase y turismo a subi atrobe na 2021. Minister Presidente a declara cu e ta premira 2022 como aña di recuperacion. E ta haya cu no ta hustifica medida 12.6 % cu a usa tempo cu Gobierno no tin entrada.
Gobierno a propone cu lo para medida di 5% y lo kita ATV dagen. Esaki ta incomprondibel pasobra ta pidi entrega dianan liber pero Gobierno lo no tin beneficio financiero di esaki. E ta haya cu mester rechaza e demanda di Gobierno.
Mr. Mohamed a uni un parti cu ponencianan di mr. Kock. El a mustra tambe cu Gobierno kier pa SEPPA duna dianan liber ATV. No por ta asina cu ta traha 100 % pero no ta haya 100 % paga. SEPPA a dicidi cu reduci 45 minuut di les na 40 minuut sin cu ta perhudica enseñanza pa e muchanan. El a mustra cu den sector priva doñonan di trabao a reduci oranan di trabao cu menos pago. Pakico Gobierno no ta haci mesun cos.
Hues a bisa cu e ta pensa den un sentencia intermedio pa asina duna Gobierno chens duna contesta riba pregunta cu Hues a haci. Hues a bisa cu mas tarda 2 Maart 2022, lo tin un sentencia. Hues kier pa Gobierno mustra cu e ta bin cu medida structural y presenta na Gobierno Hulandes. El a bisa cu esey ta nifica cu lo mester para accion pa algun luna. E sindicatonan a bisa cu nan ta dispuesto pa warda pa sa si tin medida structural.