ORANJESTAD, Aruba – Na waf ta tumando luga preparacion pa yegada di un barco grandi di e cadena Royal Caribbean. E trabou mes no a cuminsa ainda, sino mas bien e preparacionnan. E barco mes ta yega e fin di siman aki p’asina e trabou mes cuminsa. Tur trabou preparativo tumando luga ta pa por acomoda e barco Oasis-Class, cu ta un mega crucero di Royal Caribbean.
E proyecto aki ta encera hacimento di limpiesa di e canal di e ultimo kade di APA, na un distancia di 100 meter bin abou di e ultimo pier. E proyecto ta un joint venture di e compania local Varadero Caribe y Ocean Group di Canada. Nan lo ehecuta e trabou, haci limpiesa di mas of menos binti mil meter cubico.
Marc Figaroa, CEO di Aruba Ports Authority (APA), a splica cu e prome yegada di Oasis-Class na Aruba ta programa pa e prome siman di mei 2022. E trabou primordial ta pa crea un safety buffer p’asina Oasis-Class por acomoda su mes n’e pier conoci como India-Kader. Loke nan kier ta pa na momento di drenta e canal, pa tin un safety buffer na momento di drenta y ta safe pa mara y no dal den ningun parti seco.
Inversion den e proyecto aki ta di mas o menos 1.6 miyon florin y ta bini fo’i fondo di APA mes. Ta haci esaki, unda ta mira e return investment cu e binmento di Oasis-Class y den futuro mas di e mega cruceronan aki pa nos isla. Segun Figaroa, te cu awo di 2022-2023 ta pronostica cu lo conta cu mas of menos 32 calls di Oasis-Class den waf di Oranjestad.
Desde hopi tempo caba APA ta den combersacion cu Royal Caribbean riba nan interes pa bin cu nan mega cruise ships den region di Caribe, e parti zuid, esta Aruba, Boneiro y Corsou. Nan tur tin di haci e preparativonan ey y pa Aruba ta pa crea un safety buffer pa acomoda e crucero aki den un forma sigur.
Oasis-Class ta e crucero mas largo y mas grandi di mundo! Ta un crucero cu ta capas di carga 5400 pasahero den camber di ocupacion dobel of te cu 6296 pasahero individual. E ta midi 360 meter di largura, 72 meter di haltura, ta bay 22.55 meter hundo y tin un total di 16 piso. E ta nabega riba un velocidad di 22.6 knots, o sea 41.9 km pa ora.
E ultimo biaha cu a haci draging den waf tabata na 2013 of 2014, segun Marc Figaroa. E tempo ey tabata mas bien e canal en general. Awor aki nan ta hacie n’e gang dje canal pa asina crea espacio pa Oasis-Class. E canal tabatin e profundidad caba, pero den transcurso di aña tabatin un damwand caba. Pa motibo di mal tempo el a coba, erosion y esey a haci cu tur material a los. Esey mester haci limpi awo, unda ta sac’e pa por yega profundidad bek di mas o menos di 12 of 13 meter.
E proyecto aki pa draga e canal di waf pa por acomoda cruceronan mas grandi y cu mester e profundidad pa por mara den waf, ta aparece den e proyecto di Port City y segun Marc Figaroa, esey ta e experencia cu kier crea. E vision ta cu kier mehora e experencia di e parti crucero. Oasis-Class ta bin cu un bon spin off economico pa Aruba en general. E mega crucero ta bin c’un cantidad basta grandi di pasahero cu lo ta cantando pareu den centro di ciudad y impulsa nos economia.
Door di atrae cruceronan mas grandi cu mas pasahero, lo promove un sustainable growth, pasobra APA no ta bay traha mas kade, sino lo sigui ta uza esunnan cu tin. Si tin un mega cruise ship den waf, e ora no por tin mas cu dos barco crucero eyden pareu. Asina ey ta enfoca riba self controlling.
E prome call di Oasis-Class ta e prome siman di mei 2022.