Minister Glenbert Croes recientemente a reactiva ATU cu tin un tarea indispensabel den loke ta e maneho di stranheria aki na Aruba. Recientemente e prome reunion a tuma luga.
Ultimo añanan Aruba a ser confronta cu algun reto riba tereno di stranheria (vreemdelingen) cu a haci e problemanan riba e tereno aki mas complica. Desaroyonan global manera e pandemia di COVID-19 cu a conduci na ceramento di fronteranan mundialmente cu ta rekeri otro manera di acerca y resolve e problemanan aki.
Pa yuda enfrenta e retonan aki e ley cu ta regla asuntonan di stranheria, e asina jama LTU (Landsverordening Toelating en Uitzetting), a wordo cambia/actualisa na final di 2018. Un di e cambionan ta e introduccion di e Adviescommissie Toelating en Uitzetting (ATU) cu den e ley ta regla bao di articulo 35.
E tareanan pimordial di ATU ta pa asisti e minister encarga cu Stranheria y e minister encarga cu Husticia riba optimalisacion di derechonan di stranhero, manera entre otro:
- conseha riba cambionan den e ley di LTU y maneho di Stranheria;
- reevaluacion di cartanan di apelacion;
- conseho riba procedura y reglanan tocante detencion di stranheronan den e centro di detencion,
- conseho riba procedura y reglanan pa loke ta trata asilo;
- conseho tocante procesonan administrativo den e ‘Cadena di Stranheria’ (Vreemdelingenketen).
E comision por consisti di minimal 3 y maximal 5 miembro. Na e momento di escohencia di e miembronan ta tene den consideracion cu diversidad den conocemento, capacidad y habilidad.