No ta prome bes, tampoco di dos bes pero ta di tres ocasion cu Conseho di Minister di Reino, ainda no a bay di acuerdo pa Aruba haya sosten di likides diabierna ultimo, algo cu no ta nada straño.
Realmente loke Conseho di Minister di Reino y CAFT ta haciendo, ta trata di coregi loke ultimo cuater aña y mey no a sosode cu gabinete Wever Croes I y II, pa Parlamento ya cu nombrando un set di “ja-knikkers” pa sostene e dos gobiernonan aki, Hulanda ta mira cu ta den man di e pais madre pa para tanto incapacidad cu pueblo di Aruba ta confrontando.
Parlamentario Mike de Meza tabata directo den su declaracion, mustrando cu simplemente Hulanda a perde tur confiansa den Aruba su Prome Minister, kende tin un gobierno cu ta gobernando pa bienestar di famia, bienester di amigo- y sponsornan, lagando pueblo un banda.
“Ta for di 2018 gobierno di Hulanda a pone Evelyn Wever Croes firma cu e tin cu drecha e situacion, cu su gobierno tin cu presenta un presupuesto na tempo y presupuesto balansa pero awor na 2022, ainda Evelyn su gobierno no tin presupuesto pa presenta.
Ta di lamenta cu pueblo tin un Prome Minister cu ta manipulando asina hopi cu interesnan di su pueblo, cu e ta afectando bida di miles di hende den un forma sumamente descabeya caminda su grito politico y di su gobierno, esta “e hende prome,” nunca a bira realidad y pueblo ta mira esaki y na Hulanda tambe nan ta mirando e desaroyo aki.
E desorden den gobernacion di e pais, ta asina grandi, caminda diahuebs ultimo gobierno a trece e cambionan di e ley di LIM pa wordo trata den parlamento, despues di cinco luna cu e gabinete a sinta caba pero e mesun gabinete aki ainda no tin presupuesto 2022 finalisa pa yega Parlamento pa su tratamento.
Pues aki ta mira claramente cu tin cu “fix” nan mes prome, pa despues bay mira con ta fix henter e asunto di presupuesto, cu ta sirbi e interes general di nos pueblo, algo cu a bira tradicion di gobiernonan di Evelyn Wever Croes.
Awor Hulanda a dicidi di pone otro condicion, esta cu Evelyn su gobierno tin cu presenta un presupuesto balansa pa sigui haya ayudo di likides pero ta mesun Prome Minister y su Minister di Finansa, tabata papiando cu nan ta rumbo pa logra esey pero e mapa di e ruta aki nunca a yega Den Haag.
Ora cu analisa tur loke Conseho di Minister a trece dilanti diabierna ultimo, tur hende lo yega na mesun conclusion logico, esta cu no tin gobernacion na Aruba, gabinete Wever Croes II ta sinta man crusa lagando e pais sigui cay atras.
E plan di recuperacion economico ainda ningun hende sa di dje, no por mira actividadnan economico cu no ta for die sector priva, mientras cu gobierno mes no tin iniciativa algun pa mustra kico e lo haci pa acelera e recuperacion economico aki.
Den ningun bario, den ningun sector por mira un solo iniciativa di gabinete Wever Croes, caminda por saca afo cu algo ta wordo haci pa futuro bienestar di pueblo di Aruba pero si por scucha tur dia di nombracionnan cu ta tumando luga, mas famia y amigonan a haya trabou y caminda Hulanda ta sigui mustra cu e aumento di gasto personal ta sigui su rumbo.
Awor Prome Minister y lider di MEP kier acusa Conseho di Minister di Reino di no kier elimina e reduccion salarial di 12.6% pero en realidad e conseho aki no ta permiti su mes wordo haci ridiculo pa un Evelyn Wever Croes kende henter e reduccion salarial aki tabata su creacion, su vision pa asina cumpli cu loke el a priminti Hulanda, esta di baha gasto di personal di gobierno,” Parlamentario Mike de Meza a declara.