Dia 9 di februari 1971 Betico Croes dfm a funda partido Movimiento Electoral di Pueblo (MEP). Desde principio MEP a pone su dilanti e ideologia social-democrata, nos structura estatal y un union di henter e pueblo Arubano, sin distincion di rasa, color, religion, status social etc.
MEP ta wordo considera un partido prestigioso. Un partido cu desde su fundacion a keda un partido grandi y esaki durante 51 aña largo, ya cu MEP despues di su promer salida nunca a yega di baha bao di 7 asiento. Den henter Reino Hulandes no tin un partido politico cu un trayectoria asina grandioso!
Recordnan impresionante
Desde su fundacion te cu awor MEP a conoce tres lider, esta Betico Croes dfm, Nelson Oduber y nos actual lider Evelyn Wever-Croes. MEP ta un partido di cual despues di morto di su lider Betico Croes a wordo bisa den un vespertino Hulandes “Betico dood, MEP dood”. Sinembargo desde 1986 partido MEP a sigui crece den un forma nunca visto, estableciendo recordnan impresionante durante e eleccionnan na 2001 y 2005.
Pa yega na un trayectoria asina impresionante ta evidente cu e partido mester a haci hopi cos bon y positivo pa e comunidad aki. Y esey MEP a haci den un forma cu no ta laga duda atras.
Durante e ultimo 51 añanan partido MEP a traha incansablemente pa e desaroyo di Aruba, tanto riba tereno estatal, economico, social, cultural, deportivo etc.
Un lucha tenaz
Despues di su promer salida na 1971 Betico Croes hunto cu otro miembronan di partido y e militancia a pasa den temponan masha duro na unda nan mester a hiba un lucha tenaz contra esnan cu semper a pone trampanan den caminda pa nos Status Aparte. Danki na su carisma, perseverancia y determinacion combina cu e respaldo incondicional di su pueblo, Betico Croes y MEP a logra pone e politiconan Antiyano y Hulandes y hasta su opositornan local respeta deseo di pueblo. Pa por a yega asina leu MEP mester a haci hopi sacrificio, drama sanger, sodor y lagrima pa realisa e anhelo di nos pueblo pa su libertad.
MEP ta e partido cu a percura pa nos simbolonan di union y libertad, esta himno y bandera, nos propio moneda, ortografia, Constitucion, Gobierno, Parlamento, Gobernador, Banco Central etc.
Referendum y Augustus Scur
E referendum di 25 maart 1977 y e accionnan di Augustus Scur tabata determinante den e lucha pa Status Aparte y ta danki na e accionnan aki Aruba a wordo scucha door di Hulanda.
Finalmente e deseo di Aruba a wordo cumpli durante e Conferencia di Mesa Rondo na maart 1983 na unda nos derecho di autodeterminacion a ser reconoci y aproba pa nos sali for di Antiyas dia 1 di januari 1986 y cu nos lo bira independiente dia 1 di januari 1996 den un Man Comunidad cu Hulanda. E fecha di Independencia a wordo impone riba Aruba pa por a sali for di Antiyas. E tempo ey Betico Croes a bisa bon cla cu Aruba lo acepta por lo pronto e condicion aki, pero cu nos lo bolbe. Y ta cu honor dia 13 di juli 1990 ex-Minister President Nelson Oduber a percura pa schrap e fecha di Independencia 1996 for di den Statuut, pero manteniendo e derecho pa bira independiente dia cu e pueblo aki den un referendum dicidi esaki den su mayoria cu aprobacion di 2/3 parti di Parlamento.
Otro logronan grandi di MEP
Tabata danki na e logro di Status Aparte na 1986 cu MEP a realisa, Aruba a haya e instrumentonan economico pa por logra desaroya e pais aki. MEP ta wordo considera un partido constructor ya cu durante gobernacionnan di MEP un gran cantidad di proyecto a ser ehecuta: Practicamente tur e casnan social a wordo construi pa MEP, complehonan deportivo, edificionan di gobierno, construccion y renobacion di scolnan, tur e empresanan estatal, Plan Sasaki, wardanan di polis, careteranan, teleshopnan, casnan di cuido, Centro medico SN, parke di Molina na Vader Piet, Ritz Carlton y otro hotelnan di prestigio. Tambe reapertura di refineria Coastal, e garantianan di SACE, 250 miyon florin di Plant NV etc. Tur e logro y proyectonan aki ta visibel pa un y tur den comunidad,
Awe cu MEP ta cumpli 51 aña un gradicimento ta bay na su lider inmortal Betico Croes, lider honorario Nel Oduber, lider actual Evelyn Wever Croes, Conseho y Directiva di partido, lidernan di bario, presidentenan, Forza Femenino Grace, HOT y tur su votadornan.
Pabien na e famia grandi di MEP. MEP semper di pueblo, cu pueblo y pa pueblo.
