Home Politics PROME MINISTER EVELYN WEVER-CROES:  COMO PAIS NOS MESTER RECHASA CORUPCION MANERA DI...

PROME MINISTER EVELYN WEVER-CROES:  COMO PAIS NOS MESTER RECHASA CORUPCION MANERA DI BENNY SEVINGER 

SHARE

ARUBA MESTER DI NOS TUR PA STOP ESAKI

 

ORANJESTAD – Aruba e siman aki lo ta testigo di caso contra Benny Sevinger y 10 sospechoso mas.

E caso ta un di esunnan mas serio cu Aruba a conose, y ta trata corupcion serio cu tereno. 

E acusacionnan oficial ta:

  1. Soborno: Cumpra ambtenaar
  2. Estafa
  3. Falsificacion
  4. Abuso di funcion

 

Benny Sevinger ta wordo sospecha tambe di falsificacion, estafa y abuso di su funcion, y aparte di tur esaki e ta wordo acusa tambe di a tumamento di regalo of promesa, y labamento di placa! Cu esaki Benny Sevinger y demas 10 sospechoso no solamente a enrikese nan mes, pero a perhudica miles di famia y hobennan cu nunca mas por yega na nan cas. Esfuersonan ta andando pa kita e terenonan aki di e hendenan aki pero ta un proceso largo. 

 

Ta hopi importante pa nos cada un pone bon atencion na e caso aki. 

 

Pa loke ta trata e otorgamento di tereno, desde cu ex minister Marisol Lopez-Tromp a wordo retira na oktober 2020, mi a delega e autoridad pa e departamento en cuestion bou di un sistema estricto di ‘checks and balances’ pa asina nunca mas un minister por mete den e maneho aki y pa evita corupcion. Esey tabata e prome paso. 

Awor mi ta haci apelacion na henter comunidad. Aruba mester di nos tur. 

Empleadonan publico en especial cu mira e cosnan aki ta pasa, mester bin dilanti y denuncia corupcion. 

Comerciantenan cu ta wordo pidi pa paga placa bou di mesa, mester nenga categoricamente y denuncia e corupcion aki. 

Hunto nos por stop corupcion. Aruba mester di nos tur pa logra esaki.