Home Corte Abogado di caso Avestruz na Hues: Mi clientenan no kier presenta na...

Abogado di caso Avestruz na Hues: Mi clientenan no kier presenta na Corte pa no wordo ataca pa Prensa

SHARE

ORANJESTAD – Awe mainta a cuminsa cu tratamento di e caso Avestruz pro forma. ARUBA NATIVE por a compronde cu den sala di Corte por a mira un Hues di Curacao compaña pa su Griffier, dos Hues y un cantidad di abogadonan cu a representa nan clientenan.

E 11 sospechosonan cu mester a presenta ta: Ewald Biemans, Franklin Abath, Edgar Werleman, Ninosca Nuñez, Oslin Sevinger, Reina Richardson, Maria Leoncita Arends, Pieter Susebeek, Carlo Mansur, Curt Harms, Frederic Every.

Relaciona cu e medidanan pa cu Covid, a parti e 11 sospechosonan den dos grupo. E promer grupo lo mester a presenta 10’or di mainta y e di dos grupo lo tabata 2’or di merdia. Ta asina cu abogadonan a avisa Hues cu nan clientenan lo no presenta.

Fiscal bisa cu caso Avestruz ta relacion cu dunamento di terenonan na forma no corecto. Sevinger como minister a otorga e terenonan.

Mr. Oomen cu ta representa Biemans, Werleman y Nuñez, ta e promer abogado cu a hiba palabra. El a señala na Hues cu na December 2021 promer cu e receso di Corte, a haya e caso Avestruz for di Fiscal cu ta consisti di mas cu 21 mil pagina. Ningun abogado a spera esaki y no tabatin tempo pa studia esaki. Ta imposibel pa por studia tur e documentonan aki den un periodo di 1 luna y pa bin cu peticion den e caso pro forma. Mr. Oomen Esaki ta contra e principio di husticia husto.

ABOGADONAN A PIDI POSPONE E CASO

Mr. Oomen a pidi Hues pa duna tempo te fin Maart 2022 pa studia e caso pa asina den un otro pro forma haci peticion di investigacionnan. Ta asina cu e otro abogadonan: mr. Maldonado, mr. D.Kock cu mr. Illes, mr. Canwood, mr. Arendsz Marchena, mr. Carlo a bisa Hues cu nan ta comparti punto di bista di mr. Oomen. Mr. D.Kock ta e unico cu a presenta cu algun peticion. El a bisa cu eseynan ta te asina leu cu a logra di mira den un parti di e documentonan. El a sigui bisa cu por spera cu na April 2022 lo tin mas peticion.

Mr. Oomen a mustra cu 22 Februari 2018 via raport tereno gate, E.Croes y Tjong di MEP a haci denuncia y a cuminsa investigacion. E raport aki no ta den e documentonan. E ta haya cu ta persecusion politico door cu tur e sospechosonan ta liga cu partido AVP. El a mustra tambe cu di parti abogado di Sevinger a duna documentonan cu ta mustra cu tin bendemento di tereno di parti di MEP na e mesun manera cu ta acusa e sospechosonan. E abogado a bisa Hues cu e clientenan no kier presenta pa evita cu nan ta wordo ataca pa prensa.

FISCAL A REACCIONA

Fiscal a reaccion cu Ministerio Publico ta independiente y no tin nada di haci cu asuntonan politico. E raport di e dos politiconan no ta discusion den e caso aki. E caso aki ta riba e acusacionnan contra e sospechosonan. E raport cu mr. Oomen ta menciona no ta relevante.

Hues a bisa cu Diaranzon mainta e lo tuma decision riba e peticion di e abogadonan pa pospone e caso.