Savaneta – Diasabra den oranan di atardi nan un grupo di famia y amigo tabata bebiendo na un cas na Savaneta, den e grupo aki tabata tin dos ruman.
Den careda di 7’or di anochi, e dos rumannan a cuminsa bringa formalmente cu otro. Na dado momento e ruman homber grandi (61) a hinca e ruman homber mas hoben (55) cu un obheto skerpi den su nek.
Mesora a pidi pa presencia di polis y ambulance, pa motibo cu e victima tabata sangrando hopi na su nek.
Ambulance, dos patruya di polis y tambe recherche di San Nicolas a bay na e sitio.
Personal di ambulance a trata e victima y despues a transport’e cu urgencia pa hospital.
Polis a detene e ruman grandi y cu transportwagen di polis e la wordo hiba na warda di polis na San Nicolas caminda e lo mester presenta dilanti di un Sub Fiscal pa duna cuenta di locual e la haci cu su ruman.
Polis a cera e area unda e bringamento a tuma lugar, pa asina e recherchenan haci e investigacionnan necesario.
Despues cu a caba cu nan a caba cu e investigacion, e area a wordo habri bek pa trafico.
