Home Corte Parlamentario di A.V.P. Benny Sevinger hunto cu 10 sospechoso mas dialuna awor...

Parlamentario di A.V.P. Benny Sevinger hunto cu 10 sospechoso mas dialuna awor den Corte

SHARE
Parlamentario Oslin Benny Sevinger

E caso tan espera Caso Avestruz a yega corte

ORANJESTAD – Dialuna 7 Februari 2022, Corte di Husticia lo cuminsa cu tratamento di e caso penal cu Ministerio Publico a cuminsa contra un grupo di 11 persona, den cual e sospechoso principal ta e Parlamentario di A.V.P. Sr. Benny Sevinger

E caso grandi aki ta relaciona cu asuntonan di terenonan di Gobierno cu e minister di e tempo ey, actualmente Parlamentario Benny Sevinger, lo a otorga.

Por a compronde cu Ministerio Publico a presenta un cantidad di acusacion contra Sevinger entre otro: soborno, malversa propiedad di Gobierno y abusa di su funcion como minister.

Pa mustra imparcialidad den tratamento di casonan penal, mescos cu tabata e caso cu e caso Paul Croes, den e caso aki, un Hues di Curacao lo bin Aruba pa trata e caso.

Segun e rol di casonan penal, un total di 11 sospechoso ta aparece y un compania. E sospechosonan cu mester presenta dilanti den Corte ta: Ewald Biemans, Franklin Abath, Edgar Werleman, Ninosca Nuñez (tabata meti den e caso Ibis tambe) Oslin (Benny) Sevinger, Reina Richardson, Maria Leoncita Arends, Pieter Susebeek, Carlo Mansur, Curt Harms, y Frederic Every.

E compania cu tambe ta aparece riba e rol ta: Prestine Estate N.V.

Ta asina cu e caso lo bay ta pro forma. Esey ta nifica cu no ta bay tin tratamento di e caso sino mas bien Hues lo bay scucha di parti di Fiscal y tambe di e abogadonan, kico mas lo ta desea pa haci di investigacion. Posiblemente lo por palabra un fecha pa cuminsa tratamento di e caso.