Home Politics Minister Rocco Tjon: A HACI ENTREGA DI DIPLOMA NA SEIS AGENTE...

Minister Rocco Tjon: A HACI ENTREGA DI DIPLOMA NA SEIS AGENTE POLICIAL CU A COMPLETA NAN “CURSUS VEILIGHEID MOTORAGENT” EXITOSAMENTE

SHARE

 

 

ORANJESTAD – Diahuebs mainta, Minister di Husticia y Asuntonan Social Sr. Rocco Tjon, tawata presente na e parkeerplaats di Centro Deportivo Simeon Antonio, caminda seis agente policial a haci un demostracion chikito pa loke ta trata e “Cursus Veiligheid Motoragent”. Un dia importante pa henter Cuerpo Policial di Aruba, reenforsando aun mas, e unidad di motor di Cuerpo Policial.

 

Segun Minister Tjon, ta trata di un dia sumamente importante como cu a traves di e curso aki cu e seis agentenan a logra caba, e siguridad pa nan mes tambe riba caminda lo bay aumenta bastante. Na mes momento, a celebra dobel, mirando cu pa prome bes tin un ser femenino cu tambe a gradua pa e curso aki, no pa prome bes na Aruba, pero a traves di e instituto Canades cu ta certifica e agentenan policial cu ta traha den un unidad motorisa, y pa prome bes tin un hende muhe cu ta termina esaki. 

 

E curso aki ta di balor agrega y ta uno riba nivel internacional. Ta asina cu, Canada ta certifica e agentenan aki, y como bentaha, na Aruba nos tin nos propio instructor cu a pasa diferente cursonan na Canada, pues e ta e persona cu ta certifica tur e coleganan aki na nomber di e Instituto Canades. Segun e Mandatario ta splica, actualmente tin hopi interes pa e tipo di cursonan aki, na Curacao y St. Maarten, pues Aruba por ta hopi orguyoso di e unidad aki. Por ultimo, a duna di conoce cu tin diferente plan na caminda pa e unidad aki, nan a entrega nan “wenselijkheid begroting” caba, caminda algun material cu ta hopi importante pa nan propio siguridad a wordo busca, manera helmnan cu ta cumpli mas aun ainda cu e safety standardnan.