Home Politics Parlamentario Marco Berlis (MEP):  E SOLUCION DI RWZI TA INVERSION Y MANTENCION...

Parlamentario Marco Berlis (MEP):  E SOLUCION DI RWZI TA INVERSION Y MANTENCION STRUCTURAL

SHARE

Dos dia pasa den un reunion publico cu a dura 12 ora, nos a trata e tema di e rapport di Carmabi y di e situacion di RWZI. Hopi a ser bisa, sinembargo, locual cu Aruba mester awor ta un solucion concreto y un sistema nobo di maneho pa confronta y resolve e crisis aki. Ta pa e motibo aki, fuera di ta critico riba e maneho cu gobierno di Aruba a hiba pa hopi tempo cu RWZI, mi a presenta un mocion den e reunion publico aki. E mocion ta presenta e solucion pa e situacion pa e crisis cu RWZI. Den mi mocion aki mi ta urgi gobierno di Aruba, pa banda di inversionnan haci caba y esunan presupuesta, pa bin cu un meerjarenplan structural di mantencion pa tur tres planta di RWZI, specialmente esun na Bubali Plas. Tambe ma urgi gobierno den e mocion aki, pa aloca e fondonan necesario den begroting pa asina por realisa e inversionan necesario pa mantene structuralmente tur tres planta di RWZI. Asina mi kier contribui cu e maneho di e plantanan aki y sigura cu ora a renoba y cumpra instalacionan nobo, nos no lo pasa nunca mas den un crisis asina aki.

 

RWZI a conoce inversionnan clave den e planta na 2020 pa 3.6 Miyon florin ademas di un otro inversion di 830.000 florin pa ekiponan critico cu tabata tin mester. Ademas di esaki gobierno di Aruba a presupuesta 16 Miyon florin pa un inversion na e plantanan cu lo mantene y subi e calidad di e purificacion cu 10%. Esaki no ta yega na e norma cu e mester ta, sinembargo lo yuda e planta draai hopi mihor. Esaki no ta e solucion pero si un mehoracion necesario te ora e planta nobo wordo cumpra. 

 

Lamentabel tabata, cu durante e reunion publico di Dialuna e hipocresia di AVP, cual a wordo demostra door di diferente informacionan. Finalmente, AVP a haye confronta cu hechonan y informacion cu a ponenan keda keto. Ora nan no por a sigui riba e topico pa cual e reunion a wordo yama, nan a cuminsa grita y cambia e tema! Esaki ta loke a keda estableci ayera y lesa esaki bon ciudadanonan di Aruba. Bo por wak e video di e reunion riba Facebook di parlamento di Aruba;

 

  • AVP a bin ta lidera e campaña di desinformacion riba RWZI y Carmabi. Sinembargo, den nan plan berde di gobernacion nan no a pone niun caminda, ni a dedica un frase, na e renobacion di RWZI of pa cumpra un planta nobo. Den otro palabra, mescos cu nan gobernacion di 2009-2017 nan no a haci nada pa e planta di RWZI, asina tambe nan kier a drenta gobierno sin a pone RWZI como prioridad, y asina pone nos turismo, salud di nos pueblo y nos economia na peliger. 
  • AVP a VOTA DIALUNA ENCONTRA DI UN MOCION CU TA URGI GOBIERNO PA UN PLANTA NOBO DI RWZI, ENCONTRA DI UN MEERJARENPLAN STRUCTURAL DI MANTENCION PA RWZI Y PA ALOCA FONDO PA ESAKINAN! Ainda pueblo ta kere cu AVP kier traha na bienestar di nos pais? Aki pueblo por wak cu AVP no tin pais Aruba na pecho!  

 

  • AVP a goberna 8 aña di 2009-2017 y a hinca 1 miyon so den RWZI! Nan a endeuda nos pais cu 2200 Miyon florin, pero a inverti 1 miyon so den RWZI! Kico esaki ta bisa bo pueblo di Aruba!! Nunca RWZI tabata un prioridad pa nan!
  • AVP a endeuda nos cu 2200 Miyon, pero no por a saca 60 Miyon pa un planta nobo pa RWZI! Anto esaki den un tempo unda nos economia tabata fuerte y cu abundancia! Awor nan kier bin calumnia gobierno di algo cu nan mes nunca a resolve ni inverti den dje.
  • Tur esaki ta demostra cu AVP no tin Aruba na pecho, no ta stima Aruba y awor ta dispuesto pa kibra nos unico pilar economic, nos Turismo, cu nan gañamento sistematico anti-arubiano.

 

Tambe por a wak sra.Marisol Lopez-Tromp a wordo confronta cu e berdad y cu hechonan incuestionabel;

  • Fraccion di MAS, sra. Aquanette Gunn y sra. Lopez Tromp a vota ENCONTRA di un mocion pa un RWZI NOBO! Nan a vota ENCONTRA di un meerjarenplan structural pa mantencion di e planta di RWZI. Nan a vota ENCONTRA di un planta nobo pa RWZI. Nan a vota ENCONTRA pa gobierno aloca e fondo necesario pa e proyectonan aki! Mi a spera mas di sra Gunn, cu semper ta papia di stempel parlament. Wel, ma bira tristo di wak cu sigur e tampoco no ta trahando na bienestar di pais Aruba, y a bira stempel di su lider. Y ainda pueblo ta kere cu MAS ta preocupa pa e situacion actual? Pueblo, wake up!
  • Den ultimo gobernacion sra. Lopez-Tromp como minister a ricibi e contenido completo di e rapport di Carmabi na April 2020, y no a presupuesta, ni a actua, ni a pone como prioridad nada di RWZI.
  • Ex Minister Marisol Lopez-Tromp a wordo informa door di director di DNM, y a haya un presentacion personal di dje. Awor e kier pretende cu esaki no a tuma lugar. Ta demostra e poco importancia esaki tabata tin pe. Kizas e la coi e informacion pone den laachi di olvido. Esaki ta e politica bieuw cu e ta hungando, y awe nos pais ta sali perhudica pa falta di seriedad y transparencia, na su responsabilidadnan. Awe ainda e ta hungando un politica cu ta pone su mes prome, buscando voto cueste loke cueste, semper bai poniendo e pueblo na ultimo lugar. 
  • Ex Minister Marisol Lopez-Tromp kiermeen cu e no por a haci nada pa via di Covid. Nos ta den pleno crisis y pandemia ainda, pero gobierno si e no ta duna e break cu e kier duna su mes. Sra. Lopez-Tromp; “Bo no a haci nada!” Bo tabata tin e stoel, e autoridad y e oportunidad, pero RWZI nunca a haya bo atencion y no tabata riba bo agenda!

 

Den conclusion, mi kier a dedica un par di frase simpel na mi colega sr. Mansur. Eagle LNG lo bay substitui HFO cu gas natural cu ta basta mas barata. Tur hende cu ta haci un poco research por wak esaki. Ademas, gas natural lo haci e consumo di fuel baha di 4000 bari pa 1360 bari pa dia. Matematica simpel. E ta mescos si bo cambia bo auto di gasoline pa un di diesel. Bo tanki di fuel ta sali bo mas barata! Esaki lo beneficia pueblo su saco y lo impulsa nos den un economia nobo. Pero sr. Mansur tambe kier sigui hunga politica hunto cu su coalicion di MAS y AVP. Sea bo mes sr.Mansur, bo por y sa mihor.