Home Politics Minister Rocco Tjon: A FIRMA UN “LEASE AGREEMENT” CONHUNTAMENTE CU ARUBA...

Minister Rocco Tjon: A FIRMA UN “LEASE AGREEMENT” CONHUNTAMENTE CU ARUBA PORTS AUTHORITY (APA) PA EDIFICIO NOBO PA POLIS MARITIMO

SHARE

ORANJESTAD – Diaranson mainta, Minister di Husticia y Asuntonan Social Sr. Rocco Tjon  conhuntamente cu coleganan di Gabinete Wever-Croes II como tambe Director di APA Sr. Mark Figaroa a firma un “lease agreement” esta un “huurovereenkomst” pa asina por cuminsa cu renobacion y construccion pa loke ta e edificio nobo pa Polis Maritimo situa na Aruba Ports Authority (APA). Na mes momento a firma un acuerdo tambe cu Aruba Hotel & Security Foundation (AHSF) cu lo provee fondonan pa inversionnan cu mester tuma luga, mirando cu ta trata aki tambe di siguridad pa nos bishitantenan. Di e forma aki ta percura pa un miho condicion di trabou pa e agentenan cu ta situa na APA y asina reenforsando aun mas, e siguridad na nos fronteranan. 

 

Segun Minster Tjon, esaki ta un momento sumamente importante no solamente pa su Ministerio, pero tambe pa e personal di Polis Maritimo, cual pa hopi tempo caba ta trahando bou condicionnan inadecua. E ultimo lunanan, e ekipo a traha den un trailer, pues a bira tempo pa percura pa e condicionnan di trabou pa e departamento bira uno mas adecua. E departamento aki tin un balor sumamente agrega na e cadena hudicial pa loke ta eleva siguridad na nos frontera, pero tambe eleva siguridad pa nos turistanan cu ta bishita Aruba y pa e motibo ey tambe e inversionnan aki ta na su lugar. 

 

E Mandatario a expresa di ta sumamente agradecido na Aruba Hotel & Security Foundation (AHSF) cu a forma parti di e cooperacion pa e proyecto aki por bira un realidad. Tambe a gradici demas coleganan Ministers cu a aproba e proyecto aki, conhuntamente cu Aruba Ports Authority (APA) cu ta haci inversionnan necesario. Na final di dia, por inverti den material y den edificio, sinembargo, e recursonan mas valioso den un organisacion, y den e caso aki den Cuerpo Policial, semper ta e personal. Pa e motibo aki, e punto di mas importante, cual tambe tin e prioridadi di Ministerio di Husticia y Asuntonan Social, ta pa percura cu personal por traha den condicionnan adecua, como tambe percura pa nan tin e materialnan necesario pa por eherce nan trabou. Pa hopi tempo caba ta den proceso cu diferente plataformanan strategico, manera e “strategisch grensoverleg” caminda tur e diferente departamentonan cu tin un rol crucial pa eleva siguridad na nos fronteranan ta bin hunto. Sinembargo, na final di dia, e dedicacion di e coleganan cu ta haci e trabou “on the field” ta loke ta importante, pues e inversion aki sigur lo ta di balor agrega pa sigui motiva e coleganan tambe.