Home » A scohe entre e 12 empleadonan di luna di 2021 Rachelle Roos ta empleado di aña 2021 na HOH

A scohe entre e 12 empleadonan di luna di 2021 Rachelle Roos ta empleado di aña 2021 na HOH

by Admin
0 comment 48 views

Dr. Horacio E. Oduber Hospital ta kere den su empleadonan y ta haya importante pa demonstra gratitude y aprecio na cada momento. Y ya pa basta aña ta saca fielmente empleado di luna y tambe merecidamente e empleado di aña. Na comienso di aña a pidi team di maneho pa anonimamente vota ken pa nan merece e elogio di wordo nombra empleado di aña 2021. Dialuna 31 di januari a invita tur empleadonan di luna di 2021 hunto cu team di maneho pa bini hunto un rato pa e anuncio grandi. Director financiero, sr. Gregory Croeze yena di alegria y aprecio a anuncia cu empleado di aña 2021 a keda den persona di Rachelle Roos.

Tur empleado di luna ta fantastico y ta contribui enormemente na Hospital trahando semper pa e bienestar di tur pashent y tambe coleganan. Sr. Jacco Vroegop, director di hospital, a duna di conoce cu gerencia a vota anonimamente pa asina scoge e ganado di 2021 den forma di un encuesta. Na final como resultado a sali ganado absoluto Rachelle Roos, management assistant Facilitair Bedrijf, cu durante 2021 tabata empleado di luna na februari. Sr. Croeze tabata specialmente contento paso e tin hopi aprecio pa tur empleado di luna pero Rachelle ta cay bou di su cluster y esaki ta algo extra special.

“Mi ta inmensamente orguyoso di dje, di loke e ta haci pa nos cas. Di su alegria y energia cu e tin”, sr. Vroegop a duna di conoce. “E ta bon mereci y ta spera p’e disfruta di su titulo e aña aki. Tambe p’e ta un bon ehempel pa hopi otro den hospital, cu ta spera un dia di por bira empleado di luna y pues te hasta empleado di aña.”

Pa Rachelle esaki tabata un momento di sorpresa y e ta contento p’e escogencia di henter e team. Esaki tabata algo cu e no a spera. El a duna di conoce cu algun persona a dun’e “hints” sin cu e tabata sa. Specialmente riba e dia cu a saca empleado di aña. Nan tabata bis’e pa drecha cabey, si e ta cla pa saca potret, pero pa su persona esey tabata algo normal, estilo di tentamento. “Mi no a spera esaki mes ”, Rachelle a duna di conoce cu un smile riba su cara.

“Pabien na Rachelle, pero tambe na tur otro empleadonan di luna cu haci un trabou fantastico. “Mi ta hopi contento cu e resultado aki”, sr. Vroegop a enfatisa, cu un sonrisa grandi di satisfaccion riba su cara. Rachelle a keda contento cu e regalonan cu e la haya cu ta inclui un luga pa parkeer unda cu e ta desea riba tereno di HOH, y algun otro regalito special.

Rachelle ta un trahado remarcabel, semper puntual, servicial, profesional, discreto, cumpliendo 100% cu e organisacion cu e tin na pecho. Masha pabien Rachelle cu e tremendo titulo aki!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio