ORANJESTAD – Awe den Corte di Husticia, Fiscal a presenta dos caso penal contra Rudy Elvis Weert. E promer caso ta esun di viola, actonan inmoral, relacion sexual, dos biaha abortus na 2005 te cu 2009 di e mucha G., kende actualmente ta bibando na Hulanda y tin 27 aña. E otro caso, e caso nobo ta di e dos yiunan di e pareha actual di Weert. E dos muchanan a declara na Polis cu Weert lo a abusa di nan.
ARUBA NATIVE por a compronde cu Weert ta admiti di e abusa e mucha G. pero ta desmenti di a abusa e rumannan M. y J. Ademas ta asina cu e mama di e muchanan a declara cu e no ta kere su yiunan pasobra nan no kier pa e ta cu Weert. Tur dos mucha a bay biba serca nan tata biologico.
yera mainta den sala di Corte a bin haya sa cu Ministerio Publico a cuminsa un otro caso mas di abuso contra e ex locutor Rudy “Elvis” Weert. Den e articulo aki ta concentra riba e caso nobo mientras cu den un otro articulo ta concentra riba e caso anterior.
Fiscal a acusa Weert di a abusa su dos yiunan di crianza menor di edad. Un di e muchanan, M., a declara cu Weert a mishi na su partinan intimo riba 22 y 23 October 2012. E otro ruman J. a declara cu Weert na 2019 a force tene relacion sexual.
WEERT TA NENGA
Hues puntra Weert kico e ta pensa di e dos muchanan M. y J. nan declaracion. Ta asina cu den sala di Corte a presenta un di e muchanan tabata presente den Corte. Weert a bisa Hues cu nan no ta berdad. Hues a repasa e procesverbaal. Hues a bisa cu tata di e muchanan, e homber B., na December 2012 a haci denuncia. Esaki despues cu Voogdijraad a informa e tata cu e mucha M. cu tabata bay un school a bisa maestra cu el a wordo abusa. E mama di e mucha no kier a haci denuncia. E tata a bisa cu e yiu a bis’e cu Weert a mishi na su partinan intimo y a penetr’e. E mama a bisa cu e no ta kere M. y no ta bay Voogdijraad. E ora ey e trahador social a bay Voogdijraad. Segun mama di e muchanan, ta e tata a instrui e mucha kico pa papia y a regal’e laptop.
Hues a sigui cu e mucha J. a declara cu tempo e tabatin 14 aña, el a wordo abusa door di Weert. Segun J. e y su ruman homber tabata drumi den e camber hunto cu Weert y nan mama. J. tabata drumi banda unda Weert tabata drumi y e ruman homber banda di e mama. Banda di 3’or anochi, J. a stop di scucha musica riba su cellular musica. Weert a lanta for di cama y a pidi J. pa bay den sala. J. a nenga y e momento ey e mama a lanta. Weert bay drumi banda di mama. Despues Weert a bay drumi banda di J. y a tapa su boca cu un man y cu e otro man e tabata mishi na su partinan intimo. Despues di un rato, Weert a kita sunu y penetr’e. E mucha a yora. El a bisa Polis cu el a haya hopi dolor y tabata yora. Weert a bis’e pa keda keto sino e lo bay haci mesun cos cu su ruman homber chikito.
Su siguiente dia e mucha J. a bisa su mama cu e kier biba serca su tata. E no a conta e mama pasobra e mama no ta kere. J. no a conta su tata tampoco pakico a bay biba serca dje. Ta asina cu na dado momento J. a bira depresivo y a cuminsa corta su mes cu blade. El a wordo trata pa psycologo y el a conta psycologo kico a pasa cun’e. Hues a remarca cu e no a haya relato di school cu a mira e mucha ta corta su mes. Tampoco tin relato di psycologo.
Fiscal ta haya Weert culpable. El a bisa cu aunke no tin prueba di sosten, a usa e declaracion di e victima G., caminda Weert ta admiti. Esaki pasobra ta e mesun forma di actua ta bin padilanti. Ta asina cu pa tur dos caso Fiscal a exigi 12 aña di prison pa Weert.