Diamars anochi, despues cu Aruba henter a celebra dia di Betico, den oranan di anochi algun habitante di Mandolinstraat mester a drumi riba vloer na momento cu un brommer y un scooter cu dos persona riba dje lo a pasa los varios tiro den e caya aki.
Mandolinstraat/Pindastraat:
Diamars anochi, manera ta custumber, den oranan di anochi varios habitante di Mandolinstraat ta sinta un rato pafo prome cu bay drumi. Tambe algun hoben tabata sinta riba cura di cas, na momento cu di golpi a yega un brommer cu a keda haci masha hopi desordo na altura di e crusada di Pindastraat cu Mandolinstraat, e motociclista a saca un arma y a los algun tiro dje e la bay cu velocidad halto for di e sitio.
Despues di algun minuut den Mandolinstraat un scooter cu dos persona a bin di panort y bayendo na e crusada di Pindastraat cu Mandolinstraat, a cuminsa los como 5 pa 6 tiro den halto y dje a sigui bay. Na momento cu e habitantenan a scucha e tironan nan a pasa man pa nan yiunan y a core bay paden. E hobennan pafo mesora a drumi abou. Algo cu sa pasa na paisnan bisiña, pero no na Aruba.
Un di e habitantenan a conta Arubanative.com cu e la scucha na momento cu e tironan a cay, algo manera un placa cay dilanti su cas. Ora e scooter a bandona e sitio, un di e habitantenan a sali pafo y riba e caminda dilanti su cas e la a bin topa cu un huls. E tabata un susto pa e habitantenan di Mandolinstraat, pa motibo cu tabata trempan ainda, hopi famia cu muchanan chikito y hobennan tabata pafo na momento cu e scooter a pasa los tiro.
Varios unidad di polis a yega na e sitio, testigonan a conta polis kiko nan a mira y a duna polis un bon descripcion di e personanan riba e scooter y e brommer. Un di e personanan riba e scooter tabata un persona color cla y e otro ta un persona color scur cu dreads (rasta). Tambe tabata tin testigo cu a reconoce e personanan riba e scooter. Door di e bon descripcion y bisiñanan atento, polis a haya informacion corecto y suficiente cu polis por a sigui cu nan investigacion.
Un parti di Mandolinstraat a wordo cera pa mas investigacion, mientras varios otro patruya a sali busca e dos sospechosonan cu a los e tironan.
