Dialuna merdia, alarma a keda bati, na momento cu a drenta un melding cu pabou di Riu hotel, un mucha di 3 aña lo a cay den lama y esnan cu tabata riba e boto supuestamente yama “Elay”, no por haya e mucha aki y mucho menos nan no lo tabata sa tampoco unda e mucha lo a cay na awa. Despues a bin resulta cu tabata trata di un mucha di 9 aña y e boto no yama Elay.
Palm Beach/ Hadicurari:
Dialuna algo despues di 1’or di merdia, a drenta e prome informacionnan via marine radio, e la wordo capta na Corsou. Un persona cu ta papia Ingles lo a informa nan, cu su yiu di 3 aña lo a cay for di boto den lama pabou di Riu Hotel. Mesora Corsou a pasa e informacion aki pa Aruba Ports Authority. Hopi lihe su tras a drenta un otro informacion, den cual e persona tabata bisando cu e mucha a wordo haya.
A.P.A. a pidi pa papia cu e capitan di e boto, pero nan no a contesta A.P.A. mas.
Alarma a wordo bati na Alarm Central, Central di polis, Kustwacht. Un team grandi di polis riba tera, Maritiem Politie, Helicopter di polis y Kustwacht a cuminsa cu un buskeda den e area di Palm Beach.
Poco rato despues riba beach na Riu Hotel, un mucha di 9 aña a landa yega tera y lo a conta esnan na Riu Hotel cu e lo a cay for di boto y a landa bin tera. E informacion aki a wordo duna na Polis y e mucha lo a bay Marriott Hotel, tabata trata di un famia turista cu lo a cumpra un boattrip y durante e boattrip e mayornan no tabata pone bon tino riba nan yiu di 9 aña y esaki a cay for di boto den lama, e mucha tabata sa landa, por a yuda su curpa yega tera. Despues cu a keda conoci cu e mucha a yega tera na Riu Hotel, e boto cu e mayornan tabata riba dje despues di un rato a regresa na e beach na Marriott hotel, caminda e famia lo ta hospedando. Polis a bay na Marriott y a papia cu esnan encarga cu e boattrip.
Despues cu e mucha a yega Marriott caminda e famia ta hospedando y e mucha a reuni cu su famia bek, polis, helicopter di polis, maritiem Politie, kustwacht etc a sigui nan caminda.
