ORANJESTAD – Minister di Salud Publico Sr. Dangui Oduber tin e deber di anuncia cu diasabra y diadomingo dia 22 y 23 di januari ta tuma lugar un vacunathon pa tur mucha entre 5 pa 11 aña di edad. Den e vacunathon aki e muchanan lo bay ricibi e vacuna di Pfizer den un dosis cu ta menos cu esun pa adulto, e hangua cu lo wordo uza tambe ta special pa mucha. E vacunathon lo bay tuma lugar na Centro Deportivo Betico Croes na Santa Cruz di 9 or di mainta pa 4 or di atardi.
Pa bin na remarke pa e vacunacion, e mucha mester tin edad entre 5 cu 11 aña y no mag di tawata contagia cu COVID-19 menos cu 12 siman pasa (despues di 1 november 2021), unda e mucha ta biba no mag di tin hende den isolacion, e mucha no por ta den cuarentena y no mag presenta na e VacunaTHON cu sintomanan di COVID-19.
Pa facilita e proceso durante e Vacunathon, Minister Oduber ta pidi mayornan pa download e Aruba Health App y registra boso yui den dje bou di “add user” y presenta cu e carchi di AZV of informacion di AZV digital of paspoort si en caso e mucha no tin AZV. Tambe ta pidi pa solamente 1 mayor of voogd acompaña e mucha na e Vacunathon, pa evita un multitud di hende demasiado grandi.
Minister Dangui Oduber ta invita tur mayor cu tin e interes pa nan yiu haya e vacuna contra di COVID-19 pa haci uzo di e Vacunathon aki cu ta special pa nos muchanan.