Contrario na loke oposicion kier crea na impresion, e problematica rond di nos RWZI-nan y e situacion di preocupacion relaciona cu nan no ta algo di awe. No ta un situacion crea tampoco door di Gabinete Wever-Croes. Ta algo cu ta bin ta tumando lugar sigur mas cu 10 aña caba.
Den transcurso di e añanan e situacion a keda bira mas preocupante sin cu e la haya e trato di prioridad. Pero keda sin haci nada no ta un opcion mas. No ta un rapport tin, ta diferente nan ta. Por cierto aña pasa riba dia 18 di oktober 2021 Gobierno a tene un conferencia di prensa masha amplio caminda expertonan di DOW a elabora extensivamente over e RWZI. Sigur tur preocupacion cu awe oposicion kier presenta manera ta noticia nobo a keda presenta debidamente. A keda senala debidamente kico tur ta e problema, risico y peligernan. Na mes momento a informa kico ta e solucionnan na caminda. Como Parlamentario mi ta haya un lastima cu oposicion ta hunga awe politica di sensacion sin tene cuenta cu posibel consecuencianan negativo pa nos pais y mas aun e impacto negativo cu esaki por tin pa nos turismo. Cu e situacion ta delicado y cu tin posibel peliger esey ta un echo, awor e enfoke mester ta pa percura pa esakinan keda atendi y prioridad keda poni riba nan.
Manera Gobierno a informa durante tratamento di presupuesto di DOW aña pasa oktober, den e 1e kwartaal di e aña aki e plan di urgencia lo keda finalisa, cual a costa 3,8 miyon florin. Cu e suma aki a of lo inverti den mantencion di tur tres planta di RWZI. Alabes a cumpra diferente ekipo cu lo yuda e plantanan yega na e norma- y standardnan necesario. Na mes momento Gobierno a informa di tin e solucion a largo plazo stipula y cu awor mester traha na e manera con financieramente lo haci e concretisacion posibel.
Recientemente reunion cu Presidente di Parlamento tratando diferente topico, entre nan RWZI y e Carmabi Rapport, nos tur dos tabata di opinion cu no obstante cu Gobierno na oktober caba a informa encuanto e RWZI nan, mirando e situacion reinante ta bon pa un biaha mas Gobierno bin pa ripiti y duna mas splicacion al respecto. Presidente di Parlamento lo bay yama otro siman un encuentro publico (‘OB’) cu Gobierno y DOW pa trata RWZI y prome cu luna caba lo yama un reunion publico (‘OV’) pa trata e rapport di Carmabi.