Home Corte 12 aña di prison exigi pa Dylan Delaney sospecha di a tira...

12 aña di prison exigi pa Dylan Delaney sospecha di a tira mata Marc Mejia Flores

SHARE

ORANJESTAD – Awe e homber Dylan Andres Delaney a presenta dilanti Hues di Corte di Husticia pa e caso penal cu Ministerio Publico a cuminsa contra dje. Manera Aruba Native a publica, Fiscal a exigi 12 aña di prison pa Dylan.

Dylan ta wordo acusa cu riba 7 Juli 2021, banda di American Bar na San Nicolas, el a tira mata Marc Mejia Flores q.e.p.d.

Aruba Native por a compronde cu e sospechoso Dylan ta nenga di a tira mata Marc. El a bisa cu el a tira un biaha so na banda y cu ta un otro persona cu tabata eynan a tira y despues a huy for di Aruba.

SOSPECHOSO TA DESMENTI

Segun Dylan nan tabata para y na dado momento un auto a para y tres persona a baha, menaza cu morto y Marc Mejia Flores tabatin un cuchio y kier ataca Dylan pa hink’e mata. Un otro persona, Gio, a par’e. A surgi discusion y tiro a cay. Dylan ta para riba cu el a tira na banda di Marc. Segun Dylan si el a herida Marc e lo a cay. Hues a puntra con Dylan sa cu e no a herida Mejia. Segun Hues, Polis ta bisa cu ta Dylan a tira diferente biaha y no ta bisa cu tin un otro a los tiro. Segun Dylan e otro persona a bay riba Marc y a tira.

Hues a bisa cu Dylan a declara na Polis cu el a tira Marc den defensa propio. El a splica cu e tabata cu e dama A. y na dado momento e auto a para y Marc cu dos otro a baha. El a menaza tur hende y Marc tabatin un arma den su man. Segun Dylan, e arma cu Marc tabatin tabata un cuchiu. El a bisa cu si e no a tira, nan lo a mat’e. El a bisa Hues cu el a los 1 tiro so pero na banda di Marc.

PASA VIDEO DI ASESINATO DEN CORTE

Fiscal a pasa e video di seguridad cu a haya banda di American Bar, caminda por mira cu Dylan tabata para hunto cu algun persona y e dama A. Na dado momento un auto ta yega para y Marc cu dos otro persona ta baha. Marc a bay papia cu e dama A. y despues tabata haci expresionnan. A surgi un confrontacion entre Marc y Gio y eynan ta caminda ta mira Dylan saca arma y tira. Aparentemente tur e problema aki ta door cu Marc ta sospecha cu e dama A. tin relacion cu Dylan. Ta asina cu tanto Hues como Fiscal a mustra cu nan ta mira dos biaha chispa di candela ta sali for di e arma di Dylan cu ta mustra cu Dylan a tira mas cu 1 biaha. Dylan ta para riba cu ta un biaha so el a tira.

Hues tambe a mustra cu e dama A. a declara cu e ruman di Dylan, Gio, a bringa cu Marc. Dylan ta desmenti cu Gio ta su ruman. Hues tambe a mustra cu e dama A. a declara “My lover kill my other lover”. Dylan a bisa Hues cu e kier pa A. ta su dilanti y bisa esey. El a para riba cu e no tabatin relacion cu A.

EXIGI CASTIGO

Fiscal a bisa Hues cu e ta haya legalmente proba cu Dylan a tira mata Marc. Fiscal a mustra cu e dama A. a bisa cu :”My lover kill my other lover”. E victima Marc a sufri un tiro den pecho y e bala a sali for lomba. Despues el a fayece. Na opinion di Fiscal, e unico persona cu a tira tabata Dylan. El a bisa cu e no ta kere declaracion di Dylan. Fiscal a exigi 12 aña di prison, kitando e tempo cu e tabata sera. Pa loke ta e demanda di daño, Fiscal ta haya cu e demanda di 12 mil florin di parti di tata di victima mester wordo declara no admisibel paso no ta splica esaki. El a pidi pa aproba 5 mil florin pa gastonan di entiero.

Hues despues di a scucha e defensa a bisa cu dia 11 Februari 2022 lo tin sentencia.