Kralendijk, Boneiro:
Diamars ultimo, na e centro di Rescate y Coordinacion di Kustwacht Caribisch Gebied a drenta un informe for di central di Polis di Boneiro, cu famianan di dos piscado a contacta polis, informando cu e dos piscadonan a subi lama diadomingo bay pisca y lo mester a regresa dialuna merdia pero te diamars ainda nan no a regresa.
Kustwacht mesora despues di a haya e melding aki for di polis a manda e helicopter di Kustwacht direccion Boneiro pa cuminsa cu un buskeda. Durante cu e helicopter tabata buscando nan no a topa cu e piscadonan riba lama
Despues e avioneta di kustwacht cu ta patruya den awanan di Caribe a tuma e buskeda over for di e helicopter y a cama full e area.
Den oranan di merdia e tripulante di e Dash, a logra mira e boto noord oost di Boneiro. E Centro di Rescate y Coordinacion mesora despues di a logra haya e boto cu e piscadonan, a manda e helitcopter y tambe un Metal Shark na e localidad pa asina bay tira un bista. Na yegada a bin resulta cu e piscadonan a haya problema cu e motor di boto y a keda drief riba lama. Ambos homber tabata bon di estado di salud. E helicopter a dunanan awa pa bebe y a keda cerca di boto warda te ora e metal Shark yega. Na yegada di e Metal Shark nan a tow e boto y asina e dos piscadonan por a regresa sano y salvo cerca nan famia na Boneiro.
