Home » Parlamentario Marco Berlis (MEP): SPLICACION DI LIM PA PUEBLO COMPRONDE E PROCESO DI E LEY

Parlamentario Marco Berlis (MEP): SPLICACION DI LIM PA PUEBLO COMPRONDE E PROCESO DI E LEY

by Admin
0 comment 76 views

Como parlamentario e ta nos trabao pa controla gobierno y ta critico. Sinembargo nos critica mester ta funda y basa riba pruebanan y hechonan. Pasobra un parlamentario ademas di ta critico mester ta honesto, sincero y traha na bienestar di esnan cu e ta representa; esta nos pueblo stima. Un parlamentario mester ta transparente y trece informacion corecto y no cana rond desinformando y gaña hende cu e proposito di ganashi politico. Ta tristo pa wak con politica di oposicion ta demostra cu nan no tin nos pais Aruba na pecho. E meta di oposicion ta pa crea chaos den e pueblo di Aruba y cueste loke cueste pa ganashi politico. Asina nan ta sacrifica e paz y trankilidad di pueblo pa nan ambicionnan personal. Pesey mi ta dedica e articulo aki pa splica detayadamente tocante di LIM y su proceso, kico e ta y con tur cos ta cana pa pueblo por compronde cu tur claridad;

E wega cu L.I.M. LIM ta significa; Landsverordening Instelling Ministeries. E cuestionamento di LIM ta otro maniobra di oposicion pa haci nos pueblo kere cu gobierno ta haciendo cosnan ilegal y ta iresponsabel. LIM ta un ley, y mester pasa un caminda largo, pa asina e por yega na ultimo den Staten pa por wordo aproba. LIM ta e ley den cual ta wordo describi cual departamento y responsabilidad ta cay bao di cada ministerio. Ta completamente normal cu e L.I.M. ta tarda aproximadamente 3-4 luna pa wordo prepara y trata den Staten di Aruba. E por tarda poco mas tambe. Despues di tur eleccion, pueblo por wak cu e proceso cu e Ley di LIM ta cana, semper tumando e tempo necesario. Pero asina mes oposicion ta haci comosifuera ta algo abnormal. Pakiko? Pa crea chaos den pueblo y lanta disgusto memey di un crisis severo cu nos ta pasando aden, pa via di e pandemia. Puntra cualkier politico di experiencia cu tabata den gobierno cuanto e L.I.M. a dura pa wordo aproba ora nan a drenta gobierno.

Por wak con e lider di fraccion di MAS ta esun principal, hunto cu oposicion, cu ta canando ta grita tur caminda den prensa di LIM. Ya cu e ta pasa ta desinforma pueblo, ami lo kier informa pueblo pa medio di prensa cu prueba y documentonan lo siguiente;

Na 2017 Gabinete Wever-Croes-I a gana eleccion hunto cu partidonan POR y RED. Den e caso aki a dura 6 luna pa e LIM por a wordo aproba den Staten di Aruba. Den e caso aki LIM a wordo bekrachtigd riba 29 di Maart 2018. Unda Marisol tabata pa critica esaki? Niun caminda! Pakico no? Pasobra e tabata parti di e gobierno y esaki ta un proceso normal.
Adicionalmente, na 2017 coalicion a dicidi di baha e cantidad di ministerionan di 9 pa 8, ya cu den e gobernacion anterior AVP a sinta su so y a pone 9 ministerio den gobierno. Aki tampoco Marisol a protesta, pasobra e mes tabata e di 8 minister e tempo ey cu a drenta ultimo.
Na 2013 Marisol Lopez-Tromp a forma parti di e constelacion di AVP, cu na 2013 a dicidi cu nan lo expande e ministerionan di 7 pa 9 ministerio. Unda Marisol tabata pa keha contra esaki?
Marisol y AVP a bay contra advies y formatieopdracht di Gobernador di Aruba segun RVA, ora cu nan a bay di 7 pa 9 ministerio. RVA ta bisa duidelijk na Articulo 1 lid 3 lo siguiente; Het ontwerp voorziet in de instelling van negen ministeries, hetgeen een uitbreiding betekent met twee ministers ten opzichte van de vorige kabinetsperiode. Deze uitbreiding is contrair aan de zijdens de Gouverneur van Aruba verstrekte formatieopdracht, waarin een duidelijke voorkeur werd uitgesproken voor het behoud van zeven ministeries. Asina aki nos por wak e memoria selectivo cu Marisol y AVP tin. AVP y Marisol a bay contra e formatieopdracht di Gobernador y tur bon conseho. Acaso el a sinta grita tur caminda den prensa encontra di gobierno y cu mester kita dos minister for di trabao paso RVA a bisa cu esaki no ta bon pa haci? Marisol, bo inconsistencia, mentira y buya cu bo ta trata na impresiona cu pueblo cu ne, ta fabricacionan barata cu no tin ningun substancia y berdad tras di dje.

Adicionalmente den Articulo 1.4 di RVA di 2013, RVA ta trece na lus algun desaroyo peligroso y costoso pa nos pais, tocante e decision aki di pone 9 ministerio enbes di 7. E ta bisa asina aki; “Thans kan echter wel worden gesteld dat de uitbreiding met twee ministeries een kostenverhogend effect zal sorteren op de komende begrotingsplan…Voorts acht de Raad van het belang dat wordt aangegeven wat de financiele consequenties zijn van de uitbreiding van het aantal ministeries voor het lopende begrotingsjaar. Dit vanwege dat de facto reeds twee extra ministers werkzaam zijn en er in de suppletoire begroting 2013 hieromtrent ook geen duidelijkheid is verschaft.” Kico Raad van Advies ta bisa aki? Cu lo tin consecuencianan di gasto expandiendo di 7 pa 9 ministerio y cu esaki no ta tin claridad ni parce ta poni den e suppletoire begroting. Esaki sigur ta algo serio y ta mustra fuertemente den direccion di un forma di gobernacion iresponsabel. Nos por a wak e actitud iresponsabel aki sigur den e forma cu nan tur a endeuda nos pais. Asina mes no a tende nada na 2013 di Marisol y AVP, kendenan no a preocupa cu nada di loke Raad van Advies a bisa den su rapport.

Pakico e LIM di coalicion a dura mas cu esunnan di Gabinete Eman I y II? Pasobra ora bo tin un solo partido ta forma gobierno, no tin mucho negociacion ta tuma lugar. E ta bay hopi mas rapido. Den un coalicion mester elabora tur detayes y acuerdonan. E ta e motibo principal pakico e ta tarda mas pa keda cla, y yega den Staten.

Ora cu Ministernan nobo drenta nan ministerio, nan ta haya e mandato pa funciona den esaki. Kiermen, nan por tuma decision y funciona den nan ministerio, aunke e minister anterior ainda ta responsabel na final. Aki ta teamwork ta haci cu gobierno tin continuacion pa por sigui traha pa Pueblo. Esaki no ta stroba e minister nobo di desempeña su funcion. Esaki ta un proceso normal cu tur gobierno a usa incuyendo Marisol y AVP. Cualkier critica di esaki ta puro nonsens y un manera di purba atrae atencion y sensacion politico.

Mi ta spera aworaki cu pueblo a haya mas informacion y claridad kico e ley di LIM ta. Alaves si tin cualkier pregunta por manda esakinan pa mi, of pa wak documentonan por haci un cita pa waknan personalmente. Mi ta saca tur informacion cu tur transparencia, alcaso y sin nada pa sconde. Mi meta ta pa informa pueblo cu claridad y sinceridad.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio