Boca Grandi – Diaranson algo pasa di 10:30 mainta un accion grandi a cuminsa pariba di KIA, unda cu un persona lo a drenta cu un tas carga cu droga.
Segun informacionnan, un persona practicando e watersport Kite Surf lo a drenta bek cu un tas.
Den e tas aki esnan cu a logra mira a notifica polis, cu e lo ta carga cu varios paki di droga.
Manera e homber aki cu ta color scur y delega a ripara cu e nan a wak e, e la sconde e tas y sali core bay direccion nort.
Esaki tawata e motibo unda cu a activa Kustwacht, KIA, Helicopter y Polis unda cu a cuminsa busca homber aki.
Mientras e tas cu e droga a wordo confisca e buskeda a continua te den oranan di merdia, unda cu KIA a usa tres cacho pa busca den e area.
Por a mira personal di Kustwacht tambe buscando den e area.
Dado momento a haya un informacion cu lo a mira un homber cu lo a sali for di e barancanan y cana bay. Polisnan a topa cu e homber aki na e veld di Lago Heights.
A rista e homber aki pero a resulta cu no ta e.
Analisando e caso, e Kite Surfer aki a bay un caminda busca e tas ey y trece bek tera. Kizas no ta prome biaha cu ta hinca droga di e manera aki pariba di Aruba.
Algo prome cu 1’or di merdia a stop cu e buskeda.
Kustwacht
Den careda di 12:30 personal di Kustwacht cu tawata parti di e buskeda a bin topa cu un posibel sospechoso y ta detene.
Lo ta trata di un homber cu ta papia spaño.
E la keda bou encargo di Kustwacht, cu lo continua cu e investigacion.
