Home Dutch Kingdom Belgica/ Hulanda: Kidnapper di Dean (4) a wordo deteni pa polis, pero...

Belgica/ Hulanda: Kidnapper di Dean (4) a wordo deteni pa polis, pero Dean mes ta ainda ta perdi

SHARE

MEERKERK/GORINCHEM – E homber di Belgica, Dave De Kock cu tabata wordo busca for di weekend, pa secuestro di e mucha Dean Verberckmoes di 4 aña a wordo deteni dialuna merdia, door di polis na Meerkerk, Hulanda. E mucha mes ainda ta perdi. Agentenan policial ta buscando todo por todo pa haya e mucha.

Auto tambe a wordo haya y a wordo confisca
Segun polis, na momento cu nan a logra pone man riba dje e tabata su so. E la wordo deteni na Meerkerk, cu ta keda mas o menos 25 kilometer zuidwest di Utrecht. E auto cu e homber tabata core a wordo laga atras banda di un negoshi na Gorichem, e auto a wordo confisca.

Interogacion
Polis a interoga e sospechoso pero t’e na e momentonan aki e no a divulga unda e la laga e criatura. Polis di Zeeland West-Brabant a manda un Amber Alert. Polis Hulandes y recherchenan di Belgica ta trahando hunto pa asina trata na haya e mucha mas lihe cu ta posibel.

De Kock condena na 2010 pa a mata un mucha di 2 aña
E caso aki tin e polisnan hopi preocupa, pa motibo di loke e sospechos a yega di haci den pasado. E sospechoso, Dave De Kock na 2010 a wordo condena cu un castigo di prison di 10 aña pa morto di un criatura di dos aña, Miguel van Kiekinge. De Kock a maltrata e criatura asina pisa cu e mucha a fayece dia 2 di juli 2008. E tempo ey Dave De Kock di 21 aña a maltrata e criatura sin piedad, despues e mes a hib’e hospital. E mucha a haya hopi sla pisa na cabes y no tabata tin un caminda na su curpa cu e no a wordo golpia.
Dave tabata pareha di e mama di e criatura Miguel van Kiekinge,  Dave no tabata traha y tabata un drogadicto.

Ultimo mira na Sint Nikolas Belgica
De Kock a wordo ultimo mira cu Dean (4) diaranson mainta na Sint Nikolas na Belgica, cu no ta keda mucho leu di e frontera cu Hulanda. Aparentemente Dave de Kock varios biaha tabata babysit e mucha, maske e no ta e tata di e mucha. Mama di e mucha a entrega keho na autoridad cu su yiu ta perdi, esaki a sosode diasabra merdi, despues cu e la papia cu Dave.

Gañamento
Dave a bisa e mama cu e ta na Hasselt, pero cu e la haya flat tire y mester a warda riba takelwagen, pesey e la tarda pa trece e mucha. E mama a conta cu pa motibo di salud, diaranson siman pasa e la hiba e mucha cerca su amiga na Sint-Gillis-Waas, e amiga aki ta pareha di Dave De Kock, e mucha lo a keda drumi un anochi cerca e amiga. Segun e mama ta su custumber caba di laga su yiu bay drumi cerca e pareha aki y segun e, e conoce nan bon. Diahuebs e pareha a bisa e mama cu Dean lo keda un anochi mas cerca nan.
E amiga a gaña e mama di Dean, cu e lo a yama e wela di Dean pa bis’e cu Dean lo keda drumi un anochi mas cerca nan y cu diabierna e lo bay cerca e wela. Maske e mama no a keda mucho contento, a laga esaki pasa.

E berdad cu Dave a bay cu Dean y Dean ta perdi
Diabierna anochi ora cu e mama di Dean a bay na su mama pa busca Dean, e no tabata eynan, a bin resulta cu e amiga niun rato a yama e mama pa bise cu e lo trece Dean diabierna. E mama di Dean a bira desespera. Despues e la bin tende cu su amiga y Dave De Kock lo a haya problema grandi y cu su amiga a saca Dave for di cas, pone riba caya. Diabierna atardi Dave a bay for di cas y a hiba Dean cu ne. Pakiko e la bay cu Dean no ta mucho cla, pero e amiga no a durf di bisa e mama loke a sosode.

E mama a bay polis entrega keho cu su yiu ta perdi
Diasabra e mama a bay polis pa entrega un keho cu su yiu ta perdi, diasabra merdia ainda e mama di Dean a papia cu Dave De Kock. Tur loke e la bisa e mama tabata puro gañamento.

E mama rogando Dave De Kock pa trece su yiu bek
E mama desespera a haci un yamada na e babysitter Dave De Kock rogando E:” trece mi yiu homber cas of lag’e na un luga safe cerca hende, esaki ta e unico cos cu mi ta pidibo”
Diadomingo polis di Belgica a parti e informacion rond, cu ta buscando e homber Dave De Kock di 34 aña y e mucha Dean Verberckmoes di 4 aña.

Dean tabata hopi custuma cu e pareha
Dean a haci un operacion chikito diamars ultimo y pa motibo di salud e mama no por mira pa su yiu y a palabra cu su amiga pa Dean keda un anochi cerca su Amiga cu ta pareha di Dave de Kock. No ta prome biaha cu Dean a keda drumi cerca e pareha. E conoce nan bon, e ta gusta bay keda cercanan y e diaranson aki e la bay contento cercanan.