Armando ‘Ali’ Petalo (16) tira fatalmente den un cas na Amsterdam-zuidoost.
Diadomingo anochi algo despues di 7’or di anochi, den un cas na Sinderenstraat na Amsterdam-zuidoos un mucha homber di 16 aña Armando Petalo a wordo tira fatalmente, Armando cariñosamente tabata wordo yama ‘Ali’. Polis a detene dos mucha homber di su mesun edad, cu tabata hunto cu Ali na momento cu e la wordo tira. Un di tres hoben su mes a meld na warda di polis, ta trata di tres menor di edad.
Kiko e motibo ta tras di detencion di e hobennan aki y di kiko nan ta wordo sospecha, ainda no ta conoci. Segun testigonan nan ta amigo di e victima. Posibelmente nan a wordo hiba warda di polis pa motibo cu e circumstancianan rond di e tiramento ainda no ta duidelijk pa autoridad.
Segun un testigo, esun cu a tira Armando mes, a huy for di e sitio. E tiramento a sosode den e cas di e tata di Armando, kende ta hospedando na Inglatera. Un scenario cu ta wordo investiga pa autoridad ta, cu probablemente e mucha hombernan aki tabata hungando cu un arma di candela.
Despues di e tiramento e famia di e victima a reuni dilanti di e cas, caminda polis tabata tin cera pa haci e investigacionnan necesario. Un momento hopi emocionante, Armando Petalo ta desendiente di gitano, un famia Roma y nan ta papia Romani.
E wela di Armando tabata yora inconsolabelmente, bisando: “E la muri, E no tey mas”. Tambe un ruman muhe cu tabata na caminda pa Amsterdam a scucha cu su ruman chikito a muri, e tambe na yoramento tabata bisa: “E la bay, mi no por compronde dicon”. Un otro ruman muher di e victima tambe tabata puntra su mes dicon, pakiko un hende lo kier a mat’e.
Despues cu tata di Armando a wordo poni na altura di e sucedido, e la bira yama tata di un di e amigonan di Armando, e la bis’e cu su yiu a wordo mata, pa e bay check si su yiu ta ok. E tata di Armando, no por a reaciona, e la bisa cu loke a pasa den e cas y con e la pasa, e no sa ainda, djes cu su yiu a bisa su tata cu nan lo bay chill un rato den e cas. Dos dia prome e tata di Armando a papia cu su yiui y a bis’e pa nan keda den e bon caminda.
