E homber cu tabata e prome pashent cu a haya un transplante di curason di porco, tabata basta aña tras di tralie pa a hinca un homber den un Cafe, na momento cu e la descubri cu e homber tabata basilando su muhe.
Baltimore, Maryland, Merca:
E pashent cu recientemente a ricibi na e estado Maryland, e prome transplante di curason di porco, tabata David Bennet di 57 aña, Bennet ta un persona cu un pasado criminal. Aparentemente na 1988 Bennet a hinca un homber como 7 biaha y a wordo sentencia cu 10 aña di castigo di prison. Segun ruman muhe di su victima, Bennet cu un pasado criminal no merece di ta e pashent di e primicia mundial medico.
Segun Leslie Shumaker Downey, su yiu muher a mand’e e link di e articulo y a bis’e ” Mama mira e nomber di e pashent”, segun Leslie e la bira frieu, ora e la mira ken tabata e prome pashent cu a ricibi e transplante di curason di porco. David Bennet Sr. tabata e homber cu a keda sentencia na 1988 pa a hinca su ruman chikito Edward Shumaker. Esaki a sosode den un café na Maryland. E casa di Bennet tabata sinta den scochi di Edward Shumaker. nan tabata papia y bebe, na momento cu David Bennet a cana drenta den e cafe. David no por a contene su mes y a saca un cuchiu. E la cuminsa hinca Edward den su lomba, barica y cashi pecho. Edward a sobrevivi esaki, pero a keda paralitico di su barica bay abou. Edward a biba e siguiente 19 añanan di su bida den rolstoel y mester a lucha cu diferente complicacionnan di salud. Un siman prome cu e lo a cumpli su 41 aña e la fayece.
David Bennet a keda sentencia cu 10 aña di castigo di prison, pero no mester a sinta full su castigo. Segun famia Shumaker, David Bennet a sinta solamente 5 aña. Tambe e compensacion cu e mester a paga na su victima di casi 30 mil dollar nunca lo a pag’e.
Aña pasa oktober Bennett a cuminsa haya problemanan serio di curason, su pianan tabata hincha y tabata sufri di hopi cansancio, a bin resulta cu e tabata hopi malo y cu no tin cura pa su malesa.
Despues di e resultado aki, David Bennet a wordo escohi pa ta e prome pashent pa transplante di un curason di porco pa un ser humano.
E operacion a tuma lugar siman pasa diabierne y tabata uno exitoso. Segun e mediconan Bennet ta bon di salud y ta recuperando di e operacion cu a dura 9 ora largo.
Segun ruman di Edward Shumaker esaki a dal nan duro. Nan a perde nan ruman y nan famia mester a pasa den un drama y un trauma pa hopi aña.
Segun e ruman di Ed, Leslie Downey, ” Su mayornan a sufri y muri door di a pasa den e trauma aki” E tabata un infierno pa e famia. Mientras Bennet despues di a sinta solamente 5 aña a haya chens di hiba un bon bida y awo ta bolbe haya un di dos chens den bida, door di haya un curason nobo. Segun Leslie e lo a prefera pa e curason aki y chens riba un bida nobo, lo a bay pa un otro persona cu SI merece. Leslie a sigui bisa na New York Times, cu ” E transplante di curason a duna Bennet bida, pero mi ruman nunca a haya un di dos chens den bida.” Ed mester a lucha 19 aña largo tur dia. Niun persona merece di pasa den locual Ed a pasa aden.”
E noticia aki a habri caminda pa un debate riba ken tin mas derecho riba un operacion asina aki, pa scapa bida di hende.
Riba e lista nacional di transplante di organonan na Merca tin mas di 106 mericano wardando y tur dia ta muri como 17 hende cu nunca por a yega na haya un transplante, asina Washington Post a publica. Cu criminalnan grandi ta bin na remarke pa tipo di operacionnan asina pa salba nan bida, famia di nan victimanan no por keda keto, segun e corant.
E dokternan encambio no ta mucho di acuerdo cu esaki. Segun Arthur Caplan, Professor Bio-Ethiek na Universidad di New York. “En principio pa e dokternan ta mas importante pa trata tur pashent sin importa ken e persona ta. No ta na nos pa distingui pecadonan for di santonan. Un crimen ta algo cu tin di haber cu husticia. Aki ta trata di un operacion experimental, cu por a bay full robes tambe. Segun e Professor “Pa tur claridad e homber no a ricibi un organo di un ser humano y tambe niun persona no a muri pa motibo cu a haci un transplante di curason di porco cu Bennet.
Professor Scott Halpern professor Medische Ethiek na Universidad di Pennysylvania, ” nos tin un sistema legal cu ta diseña pa determina un compensacion husto pa crimennan y nos tin un sistema di cuido di salud cu ta duna cuido sin tene cuenta cu personalidad, caracater y pasado di e ser humanonan.”
University of Maryland Medical Center, cu a trata Bennett a nenga di bisa di tabata al tanto di e pasado criminal di Bennet. E hospital na Baltimore caminda e transplante a tuma lugar a declara cu nan a basa nan mes riba e historia medico di e pashent. Bennet no tabata yega na remark’e pa un transplante regular di curason, pa motibo di su ritmo cardiaco y tambe e otro problemanan di curason.
Yiu di David Bennet, David Bennet Jr. a bisa cu differente hospital a nenga di pone su tata riba lista di espera, pa motibo cu e no tabata sigui e exigencianan di e mediconan y no tabata show up pa su citanan, tambe su tata no tabata bebe su medicamentonan consecuentemente.
David Bennet ta recuperando, pero ainda ta na machine, e curason a cuminsa custuma y dentro di 45 dia lo por kit’e di e machine.