Oranjestad/ Sero Janchi – Diabierna anochi den careda di 10’or a start un persecusion feroz di ariba Green Corridor.
Durante control di velocidad di Motor Unit
Diabierna anochi Motor Unit tawata teniendo un control di trafico basa ariba velocidad halto.
Dado momento polis a nota un vehiculo Toyota Agya acercando cu velocidad hopi halto.
Polis a para y hisando man pa e stop pa asina haci nan control, pero e chauffeur(21) sin rijbewijs a dicidi cu e lo no bay para. Kizas miedo debi cu e no tin rijbewijs.
Segun nos a compronde di polis, e Toyota Agya un poco mas lo a alcansa e agente.
Un agente den un pick up mesora a bay su tras.
Akinan e persecusion formal y alabes peligroso a cuminsa.
Den e auto tawata na stuur un hoben di 21aña y su primo menor di edad. E duo aki lo a sali for di nan cas na Boegoeroei pa bay cumpra cuminsa te na San Nicolas.
E hoben su meta tawata no matter what yega Boegoeroei.
Un persecusion cu a pasa via cayanan di Playa, Tanki Leendert, Moko y pa bay termina na Sero Janchi.
Ey ta unda cu polisnan rápidamente a sa di “neutralisanan” arestando ambos. Den algun minuut a transporta ambos pa warda di Shaba.
Por a mira cu e primo cu tawata e pasahero tawata hopi spanta.
Mayornan di e hoben tambe a yega Sero Janchi y polis a splicanan un ke otro di locual a sosode.
Mester remarca cu e persecusion aki tawata uno sumamente peligroso, cu por a termina fatal.
