ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e dama G., kende ta wordo acusa di a maltrata su yiu homber di 13 aña cu n extension cord.
Aruba Native por a compronde cu tanto Fiscal como Hues a condena e forma con G. y su pareha dama, a maltrata e mucha. Ta e abuela, tata di G., a bay haci denuncia pasobra e ta haya cu ta basta. E abuelo a bisa Polis cu no ta promer biaha cu esaki ta sosode y cu hasta un di e yiunan di G. a haci denuncia na Voogdijraad.
MALTRATO
Durante tratamento di e caso a resulta cu G. lo a maltrata su yiu riba 3 Maart 2021 pasobra B. lo a nenga su mama su peticion pa yuda drecha un pallet pafor den cura pa mudamento. B. a bisa su mama cu e no por pasobra e tin proefwerk su siguiente dia y e kier prepara bon. A surgi un discusion caminda e mama promer lo a coy un palo di basora dal B. Despues B. a bay den su camber y eynan cos a bay for di man. E mama G. a bay den e camber caminda e discusion a caba den maltrato cu extension cord. Despues di a wordo maltrata, B. a dicidi di bay for di cas. E mama G. a bis’e cu e por bay pero no ta bay cu ningun bicicleta. B. a sali bay na pia. G. a yama su mama pa bisa kico a sosode y un rato despues e abuelo a topa B. riba caminda. E abuelo a dicidi di haci denuncia ora el a mira con B. a keda marca di e maltrato.
E mama G. a bisa Hues cu el a puntra B. si por yuda cu un pallet pafor pasobra nan ta mudando. B. a bisa cu e no por pasobra e tin lesnan pa siña. El a cana bay den su camber. Segun G., B. a bis’e mal palabra y G. a bis’e pa no papia asina. B. a altera y dal’e un want’e na cara y e bril di G. a cay. Segun G., B. a push’e y el a cay riba vloer y B. dal’e skop. E momento G. a pasa man pa un extension cord di television y zwaai riba B. El a grita su pareha pa bin yud’e. Segun G. el a bisa B. cu e no por bay cu bicicleta y B. a cana bay. E momento ey G. a yama su mama bis’e kico a pasa cu B. Segun e pareha, el a kita B. di dal su mama pero no a dal B. cu waya.
G. a bisa Hues cu e sa cu el a haci un fout di dal su yiu pero a haci esey pa defende su mes.
Hues a dicidi di scucha B. kende a bisa cu e kier papia e berdad. B. a conta kico a sosode. El a desmenti cu el a pusha su mama y lag’e cay y skop’e. El a bisa cu awor tur cos ta bayendo bon.
CASTIGO
Fiscal a bisa Hues cu e ta haya legalmente proba cu G. a maltrata su yiu B. cu un extension cord. Fiscal ta haya violencia no ta resolve nada. E ta spera cu esaki nunca mas lo pasa. Pa cu e castigo el a tene cuenta cu ta promer biaha cu G. ta a cay den man di husticia pa un asunto asina. Tambe tene cuenta cu tur cos ta bayendo bon. Fiscal a exigi trabao pa comunidad di 120 ora y si no cumpli 60 dia sera. Ademas 60 dia di prison condicional cu 2 aña di prueba. ABOGADO
Hues a sera tratamento di e caso y a dicta sentencia di biaha. Hues ta haya legalmente proba cu G. a dal B. varios biaha cu e extension cord na su curpa. Ta rechaza loke G. a bisa cu a actua pa defende su mes. No tin ningun marca di maltrato na G.
Hues no ta haya e castigo exigi pa Fiscal hopi severo. El a condena G. na 120 ora di trabou pa comunidad of 60 dia sera. E castigo di prison condicional el a reduci na 30 dia y 2 aña di prueba. Hues ta haya cu e castigo condicional ta necesario pa evita cu algo asina lo bolbe ripiti.