Home International Belgica: Un prostituta a wordo asesina pa via di 40 Euro, ta...

Belgica: Un prostituta a wordo asesina pa via di 40 Euro, ta spera 30 aña di castigo di prison pa e asesino

SHARE

Brussel, Belgica:
Diahuebs awo S.G.(21) lo mester presenta dilanti assisenhof pa asesinato di e prostituta di Nigeria, Eunice Osayande(23). Assisenhof ta e hof cu ta consisti di juradonan den pueblo( volksjury), nan ta esnan encarga pa husga criminalnan grandi di nan delitonan.

Assisenhof lo mester duna sentencia den e caso aki
Assisenhof ta trata casonan hopi grandi di asesinatonan, homicidionan, delitonan sexual etc. despues cu assisenhof dicta su sentencia, e caso no por bay hoger beroep mas, solamente cassatie nan por bay, pero si tabata tin un fout den e procedura. Segun expertonan S.G.(21) lo por spera un castigo di 30 aña di prison pa asesina Eunice Osayande, na un forma hopi cruel. Dialuna merdia a tuma luga e sorteo pa e juradonan cu lo tin cu husga den e caso aki. E caso aki lo mester a inicia na september ultimo caba, pero pa falta di no tabata tin suficiente candidato cu potencial pa por a funciona como jurado, e caso a wordo posponi.

E hoben S.G. (21) lo wordo sentencia riba sospecho di a asesina e Eunice Osayande (23) di Nigeria.

Eunice a wordo honra cu un caya na su nomber
Eunice a wordo asesina na Schaarbeek, riba e anochi di 4 pa 5 juni 2018. E la wordo hinca varios biaha cu un cuchiu y a fayece.
Na 2018 e sospechoso di e asesinato tabata un menor di edad. E tempo ey e jeugdrechter a tuma e desicion di entreg’e na  assisenhof pa e haya su sentencia. E morto di Eunice a causa hopi conmocion y a trece hopi miedo bou di e prostitutanan. E cuidad di Brussel recientemente a dicidi di honra Eunice Osayande y a nombra un caya na su nomber.

Eunice a cay den gara di traficantenan di hende
Na 2016, Eunice Osayande a cuminsa cu su biahe pa Belgica, sin sa kiko tabata sper’e. Bou promesanan bunita y en espera di un futuro briyante e la sali for di Nigeria hunto cu algun otro mucha muher hoben mas. Un biahe largo y yen di peliger na caminda. Na Noord Afrika nan a subi riba un rubberboat y a yega Italia. Na Italia nan a wordo busca pa algun persona cu a hibanan Belgica y manera nan a wordo priminti, caminda nan lo a bay traha den e industria di pelicula. Na caminda pa Belgica nan mester a haci un ritual di voodoo pa priminti di keda e hendenan aki fiel y si nan no cumpli nan lo paga cu nan bida of cu bida di un miembro di famia

Promesanan tabata falso, e trabou den mundo di prostitucion
Na yegada na Belgica hopi lihe nan a ripara cu nan a wordo engaña y nan a wordo obliga pa bay traha den e mundo di prostitucion. Eunice den e mundo aki na varios ocasion a wordo viola. E chulonan a exigi di dje pa e paganan 45 mil Euro pasobra nan a trecenan Belgica. Tambe e mester a paganan tur siman huur pa un apartamento pober y fies, cu e mester a comparti cu e otro victimanan di traficantenan di hende. Riba e anochi di 4 pa 5 juni 2018, Eunice Osayande a fayece na e edad di 23 aña door di 17 hinca cu e la ricibi di un cliente hoben di e tempo ey di 17 aña.

Eunice a wordo asesina pa via di 40 Euro
Riba e anochi di 4 pa 5 di juni 2018, Eunice a bay cu un cliente un mucha homber di 17 aña. E hoben a paga 40 Euro, pero no tabata satifecho cu e servicio cu Eunice a brind’e y e la cuminsa exigi su 40 Euro bek. Ora Eunice a nenga di dun’e su placa bek. E la bira furioso, e la saca un cuchiu y manera un animal sin gevoel, e la keda hinca Eunice. Eunica a sali riba cay y riba trottoir e la cay y a fayece. E cliente a huy mesora for di e sitio, pero a lubida cu full e caya tin camara di seguridad, asina polis por a sigui’e y hopi lihe a haya sa ken e tabata y por a pone man riba dje.
E asesino S.G. di e tempo ey 17 aña a wordo deteni dos siman despues di e asesinato y te na e momentonan aki na 2022, ainda no a ricibi su sentencia.

For di estudionan a keda demostra cu na Europa como 42 porciento di muhenan entre 16 cu 69 aña ta haya nan mes un of mas biaha envolvi cu violencia sexual. Cerca e prostitutanan e porcentahe aki ta hopi mas halto.

Traficantenan a keda deteni
E gang cu a obliga Eunice (23)  pa bay den e mundo di prostitucion a wordo deteni y a keda sentencia cu castigo di prison di entre 33 luna y 4 aña. E 4 traficantenan di hende a ricibi nan sentencia na januari 2021. E traficantenan di hende tabata obliga mucha muhernan di Nigeria pa traha den e mundo di prostitucion.

Tres mucha muhe libera y a gara e traficantenan
Cuater mucha muhe cu tabata wordo obliga pa e gang di traficantenan di hende muher pa traha como prostituta, a busca e cuater mucha muhernan aki for di Nigeria y nan a cay den nan gara cu promesanan bunita.

Despues di e morto di Eunice Osayande, autoridad  a logra libera e tres mucha muher y a gara e gang di traficantenan aki. Lamentabelmente pa e victima Eunice Osayande e ayudo a yega laat. E la wordo asesina poco prome cu polis a gara e traficantenan di hende aki.

E cuater mucha muhernan aki a wordo treci na Belgica di contrabando y mester a paga nan traficantenan tambe. Paul D. tabata e cabesante di e banda di traficantenan di hende.

Prostitucion un pesadia pa e mucha muhernan
E mundo baho di prostitucion tabata un pesadia pa e mucha muhernan aki cu a wordo engaña pa e traficantenan. Loke a pasa cu Eunice a pone cu e damanan cu tabata traha den e mundo di prostitucion a stop di traha pa algun dia, door di miedo pa pasa cu nan mescos cu a sosode cu Eunice.

4 miebro di e banda di traficante di hende sentencia
E dama Faith. O. tabata un madame(chulo) cu a exploit mas cu 8 mucha muhe hoben y su ruman Ken O. (34) tambe a bestel varios mucha muher cu tambe e la gaña y a pone nan prostitui. For di investigacionnan policial a resulta cu tin posibelmente hopi mas dama cu tabata victima di e chulonan aki, pero e investigadonan no sa e nombernan of parcialmente sa ken nan ta.  Faith O. a wordo sentencia cu 33 luna di castigo di prison y mientras su ruman a haya 40 luna di prison. E dos cabesantenan di e gang di traficantenan di hende Paul D. y su ruman muher Tracey D.  tabata e personanan cu tabata recluta e mucha muhernan y tabata yuda traficanan for di Italia pa Belgica. Paul D. a wordo sentencia cu 4 aña di castigo di prison mientras su ruman muher a haya 40 luna di castigo di prison.

Traficacion di hende ta pasando na tur parti di mundo
Experiencianan hopi tristo cu muchanan muher hoben, pober cu lo kier sali di nan pais desesperadamente pa yuda nan famia, ta wordo engaña pa lobonan disfraza na carne, cu promesanan hopi falso. Banda di cu nan ta wordo obliga y te hasta mester haci cosnan hopi contranan gana, nan ta wordo abusa, viola te hasta maltrata tambe. Traficacion di hende ta sigui y ta pasa na tur parti di mundo y Aruba sigur no ta un excepcion. Te ki dia e abusonan aki contra hendenan vunerabel ta caba? Pesey ken cu sa di un of mas caso di traficacion di hende mester bati alarma.