ORANJESTAD – Mas o menos 2 luna pasa (9 di november) DOW a inicia cu “Proyecto Beach Zand” cu ta encera trabou di mantencion di beachnan door di yena beachnan cu santo. Ta trata di tres beach popular esta Arashi, Boca Catalina y Eagle Beach.
DOW a inicia cu e proyecto dia 9 di november na Arashi, despues a continua cu Boca Catalina y por ultimo a hiba santo na Eagle Beach. Ta trata di mas o menos 635 yarda di santo blanco cu a transporta pa Arashi, 160 yarda di santo na Boca Catalina y 2400 yarda di santo na Eagle Beach.
E motibo dicon a inicia cu e proyecto ta, como a tuma nota cu tin hopi piedra unda cu antes tabatin santo blanco, consecuentemente, tin menos espacio riba e beach. E trabou aki no ta algo cu ta haci tur luna, pero e ta un trabou di mantencion cu DOW ta tene cuenta cu ne pa por tuma luga na sitionan unda cu continuamente awa ta ‘come’ den locual ta e beach.
Awor cu a yena e beachnan aki bek (cu santo blanco cu ta transporta di otro area), e beach ta mas accesibel pa tur bishitante disfruta di dje.
Por ultimo di parti Ministerio encarga cu Infrastructura, kier recorda un y tur pa cuida nos beachnan cu ta parti di Aruba su herencia natural.
