Den aña 2022 e suma ta 1918 florin
Oranjestad – Un di e condicionnan pa Pais Aruba por a haya e fiansa di Hulanda pa surpasa e efectonan cu e crisis di COVID19 ta trece cune ta, cu Gobierno mester a reduci gastonan di salario y beneficio di su personal cu 12,6% manera a keda aproba den e Ley di austeridad, Landsverordening tijdelijke versobering bezoldigingen en voorzieningen overheid (AB 2020 no. 108). Pa por cumpli cu e reduccion necesario, e empleado publico mester a coopera cu entrega di 5% den salario, 50% di placa di vakantie y 50 % di e primanan paga na augustus (reparatietoeslag) y na november (najaarspremie).
Minister Maduro ta splica cu e reduccion di salario y beneficio den sector publico no ta conta pa e prima paga na januari conoci como bashipremie (voorjaarspremie). Pues den januari e empleado publico ta cobra 100% bashipremie conforme e acuerdo bilateral entre Gobierno y Sindicato di 28 di mei 2014.
Minister Maduro ta informa cu pa aña 2022 e primanan ta subi conforme e acuerdo bilateral cu 106 florin y esey ta pone cu e bashipremie na januari ta bira 1918 florin. E pago di e otro primanan na augustus y november lo wordo haci conforme e ley di austeridad na 50% di e suma aki.
Minister Maduro ta informa tambe cu e primanan aki ta wordo paga solamente na e empleado publico. Parlamentario y Ministernan no ta cobra prima y nan a entrega 25% di nan salario y beneficio como aporte na e situacion di austeridad. Apesar di e situacion financiero precario, Gobierno ta hiba un maneho financiero responsabel y ta percura pa cumpli cu su obligacionnan financiero manera acorda.