Zacatecas, Mexico:
Diahuebs den careda di 5’or y mey di mainta, Dia di Tres Rey, un SUV Mazda a bay staciona dilanti di e palacio di gobernacion Zacatecas. Un rato despues e camaranan di siguridad a capta un homber baha for di e vehiculo y a sali core bay.
E auto a keda algun rato eynan staciona, prome cu autoridad a acerca e auto y a descubri 10 cadaver den e vehiculo. Esaki a sosode riba e plaza central dilanti di e Palacio historico di gobernacion di Zacatecas.
Den e auto nan a bin topa cu enberdad 10 curpa,tabata ta trata di 8 homber y dos muher, tur 10 curpa tabata tin rastro di maltratonan severo.
E gobernador di Zacatecas, David Monreal, a confirma riba red social cu autoridad a aresta dos sospechoso relaciona cu e caso aki.
Según e corant El Universal, e dos persona nan deteni ta integrantenan di e Cartel di Jalisco Nueva Generacion. Nan lo a hiba e curpanan na e sitio aki como represaya pa e operativonan ultimamente di e fuerzanan federal .
E Gobernador a informa e habitantenan di Zacateca cu autoridad a logra detene e supuesto personanan envolvi den e sucedido cu a tuma lugar diahuebs mainta den e capital di e estado. E gobernador no por a bay den detayes pa asina no daña henter e proceso.
