Segun Parlamentario Tromp-Lee nos a sera y habri aña preocupa cu e desaroyonan encuanto e variante nobo di COVID Omicron. Durante dianan di fiesta cifranan a cuminsa aumenta y manera cu aña a habri e cifranan ta aumentando drasticamente tur dia, pero manera nos Minister President y Crisisteam a indica via nan rueda di prensa, nos no mester bay den panico.Mediante cifra y data a keda demostra cu compara cu olanan 1 te cu 4, no obstante cu e cantidad di personanan contagia ta super halto compara cu e olanan anterior, e impacto riba nos hospital ta limita. Esaki ta haci cu no ta rekeri ainda di medidanan mas severo.
Contrario na opositornan politico cu na tur momento kier cuestiona, bagatalisa y hasta atacha credibilidad di nos profesional y expertonan, ami si tin tur confiansa den nos Minister President y Crisisteam cu na un manera hopi responsabel y dirigi a bin ta manehando e pandemia aki. Tin a cuestiona integridad di full DVG y otro ta tira indirect riba credibilidad di profesionalnan di crisisteam y e cluster di enseñansa. Algo cu Tromp-Lee ta condena. Desde un principio di e pandemia, Parlamento regularmente ta keda informa debidamente y sigur tur parlamentario ta na altura di e structura dentro di cual crisisteam ta traha y ta bon bon na altura cu desicionnan ta keda tuma conhuntamente cu nos profesional y expertonan. Dus cada biaha cu nan ta ataca e maneho di e pandemia nan ta bon consciente cu no ta Minister President so nan ta ataca pero tur esnan cu ta forma parti di e structura y cu desde un principio ta aconseha y dicidi. Delaster biaha cu Gobierno y Crisisteam tabata den Parlamento tabata dia 29 di November ultimo caminda Parlamento a haya un update, a atende cu preocupacionnan di Parlamento y tur pregunta a keda contesta.
Tromp-Lee ta lamenta cu weganan politico innecesario ta keda hunga, memey di un situacion asina delicado pa nos pais. Principalmente pasobra a keda demostra cu desde cuminsamento Gobierno y Crisisteam a maneha e pandemia buscando semper un balansa entre salud y economia. Semper e siguridad y bienestar di nos pueblo a keda poni na prome lugar. Parlamentarrio Tromp-Lee ta convenci cu nos expertonan conoce nan materia y ta manehando e crisis aki lo mihor posibel, pesey mes e ta haya hopi grave cu den nan afan pa desacredita nos Minister President opositornan politico ta desacredita e team completo cu a bin ta traha incansablemente ya pa casi 2 aña caba. Pero nan ta lubida cu ta e mesun experto y profesionalnan aki nan ta acerca pa nan input pa nan por haya informacion, forma opinion y stipula vision y maneho pa futuro.
Tromp-Lee ta haci un peticion na pueblo pa ban keda cabes friu y cada un di nos percura di haci su parti (cuida, preveni, comporta etc). Na su colega politiconan e ta haci un apelacion pa stop cu weganan politico pasobra eigenlijk nos no tin espacio esakinan y mihor dedica nos tempo y critica constructivamente na progreso di nos pais. Aruba completo mester keda positivo pa hunto nos sali di e situacion aki pronto y sigui traha na recuperacion di nos pais. Awor Aruba mester di nos tur pa progresa. Abo por scoge di ta parti di dje of di ta parti di esnan cu no kier mira Aruba progresa of no kier aporta berdaderamente na esaki.