Home » Prome Minister Evelyn Wever-Croes: GOBIERNO TA REACCIONA RIBA CARTA DI SINDICATO Y TA INVITA SINDICATONAN PA DIALOGO

Prome Minister Evelyn Wever-Croes: GOBIERNO TA REACCIONA RIBA CARTA DI SINDICATO Y TA INVITA SINDICATONAN PA DIALOGO

by Admin
0 comment 82 views

Diaranson 5 di januari anochi, pa 7.37 Prome Minister Evelyn Wever-Croes a ricibi un carta di lidernan sindical SEPPA, SIMAR, SPA, SADA y FTA. Den e carta nan ta indica cu nan ta mantene nan posicion cu e recorte di 12.6 mester wordo revoca. Segun sindicatonan di empleadonan publico, empleadonan cu entrega mester haya compensacion door di traha conforme nan pago. Den e carta, lidernan sindical ta informa Gobierno cu entrante 1 di februari 2022, e empleadonan publico cu nan ta representa lo traha dos dia pa luna menos. 

 

Prome Minister, contestando lidernan sindical diaranson anochi, a informa nan cu e posicion unilateral aki no ta corecto y no ta posibel, sin consecuencia. Posicion huridico di empleadonan publico y “gelijkgestelden” ta regla unilateralmente den LMA. Esaki ta conta pa tanto salario como oranan di trabou. Un empleado publico of “gelijkgestelde” no por dicidi riba su mes cu e ta bay traha menos ora of dia. Si esaki sosode toch, esaki ta ‘plichtsverzuim’ y tin su consecuencianan.

 

Premier di Aruba a recorda lidernan sindical tambe riba e hecho cu Conseho di Minister di Reino no a trata e peticion di Aruba ainda pa stop e recorte di 12.6% di salario den 2022. Esaki ta algo cu lidernan di sindicato ta na haltura di dje tambe. 

 

“Nos ta sigui den dialogo cu Hulanda riba e topico aki. Pues no ta asina cu Gobierno di Aruba no kier stop e recorte di 12.6%, sino mas bien cu Gobierno di Aruba no por stop e recorte di 12.6% sin pone na riesgo sosten di likides necesario den 2022”, Prome Minister a enfatisa den su carta na lidernan sindical. 

 

Mientras tanto, Prome Minister un biaha mas ta recorda sindicatonan cu e invitacion di Gobierno pa dialoga y hunto yega na un posicion conhunto pa negocia cu Hulanda, ta sigui riba mesa. 

 

“Apesar cu durante nos ultimo reunion na december, sindicatonan a pone como condicion cu mester stop e recorte prome cu por bay den dialogo, mi ta spera cu sindicatonan reconsidera y apunta 3 persona, preferible cu conocemento financiero, cu por representa sindicatonan den e dialogo”, Prome Minister a termina bisando den su carta.

 

Gobierno di Aruba ta keda en espera di un contesta di sindicatonan riba e tema aki. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio