Hues a mustra cu segun e relato di Polis, Polis a haya informacion cu na cas di F.K. ta bende droga. Polis a bay haci investigacion y a haya cosnan cu tin di haci cu bendemento di droga den e cas. Total a haya 143.9 gram di marihuana, 11.6 gram di hash, 1 gram di cocaina, 9.1 gram di pilder. Ta asina cu Polis a interoga diferente hende cu a bisa di a cumpra for di N.P. for di October 2020 y N.P. ta entrega e droga.
Investigacion a mustra cu F.K. tabata e cabezante y hasta tabata bende droga na school cu muchanan. Hues a bisa cu un mucha a conta Polis cu F.K. ta manda menu di droganan pa hende scoge. Hende ta manda whatsapp y asina haya droga. Hasta tin un personal trainer cu tabata cumpra droga. Hopi ta bisa cu e droga ta wordo hiba serca nan.
E studiante di school a bisa cu hopi mucha ta spijbel pa bay usa marihuana y XTC. Tin hende ta hiba e droga pa e muchanan na school y na school e muchanan ta usa droga scondi.
Durante tratamento di e caso a sali na cla cu N.P. y su ruman F.K. tabata prepara dos tas cu diferente droga. A base di peticion, N.P. y J.R. tabata haci entrega di droga. Cada un tabatin un tas berde cu e droganan aden. F.K. tabata huur auto pa nan por haci entrega. F.K. a bisa Hues cu e tabata huur auto pa asina evita cu hopi hende ta bin su cas y molestia bisiña,
Hues despues di a scucha e exigencia di Fiscal y defensa di e abogadonan, a dicta sentencia di biaha pa N.P. y J..R. Hues a condena J.L.R. na 175 dia di prison, kitando e tempo cu e ta sera den KIA. N.P. a wordo condena na 18 luna di prison di cual 6 luna ta condicional cu un tempo di prueba di 2 aña. Hues a condena F.K. na 40 luna di prison di cual 6 luna ta condicional cu 2 aña di prueba.