ORANJESTAD; Minister Endy Croes a reuni cu directora di Stichting Monumentenfonds Aruba, sra. Anne Witsenburg. E Fundacion ta encarga cu restauracion, mantencion y huur di e edificionan monumental di Aruba. Alabes ta aporta na educacion y conscientisacion tocante e balor di monumentonan y asina tambe preserva Aruba su pasado pa futuro.
Stichting Monumentenfonds Aruba a informa e mandatario cu banda di proyecto di restauracion nan haci diferente proyecto. Un di e proyectonan cu e Fundacion ta dedica na dje t’e area di Eagle refinery na Eagle, unda ta compilando e historia y ta trahando un ruta turistico. Un otro proyecto ta Noord 2, conoci tambe como e ‘Klooster’ banda di Imeladahof na Noord cu ta un monumento proteha caba. Stichting Monumentenfonds Aruba tin interes pa cumpre y desaroya kisas den un ‘leer hotel’. Tambe e Fundacion a informa Minister Endy Croes cu ta ‘bezig’ cu proyectonan sostenibel. Stichting Monumentenfonds Aruba ta un fundacion cu no ta ricibi subsidio y ta depende di entrada di huurdonan. E Fundacion ta bin na remarca pa fondonan di Europa y por huur e edificionan bek na ‘kostprijs’. ‘E tabata un bon reunion y danki na Stichting Monumentenfonds Aruba nos por sigui garantisa e preservacion di nos monumentonan pa futuro generacionnan’, e mandatario a finalisa.