ORANJESTAD: Den luna di December Minister Endy Croes a ricibi bishita di e representantenan di Fundacion Lanta Papiamento (FLP). Presente na e reunion tabata co-fundado di FLP, Dr. Joyce Pereira, presidente di FLP sr Eduard Pieters, secretario di FLP, sra. Evelyn Ruiz – Croes y miembro di directiva, sra. Mientje Croes. Durante e reunion a trata algun topico importante pa cu desaroyo di un nacion Arubano sano. Tambe Fundacion Lanta Papiamento a informa e mandatario di e importancia y urgencia pa lanta un instituto linguistico pa Aruba. E instituto lo percura pa un maneho integral di idioma na Aruba.
Fundacion Lanta Papiamento a splica di e urgencia pa cumpli cu tratadonan internacional di derecho di mucha y pa respeta articulo 1 di constitucion di Aruba, pa ningun mucha of hoben wordo discrimina mas den nos sistema di enseñansa pa motibo di nan idioma materno. Tambe a splica e mandatario den liñanan grandi con e ser humano ta siña, kico ta pasa den e celebro y relaciona esaki cu e importancia di siña den idioma materno.
Minster Endy Croes a expresa cu e tabata un reunion informativo, educativo y ameno. ‘Esaki sigur no lo ta e ultimo reunion cu Fundacion Lanta Papiamento’, e mandatario a enfatisa. Na final di e presentacion Fundacion Lanta Papiamento a entrega nan Plan Strategico di Fundacion Lanta Papiamento 2020 – 2025 na Minister Endy Croes.