Washington: Diaranson den careda di 2’or di marduga, un Toyota Altezza, pa un motibo of otro a baha caminda y a dal contra un palo di lus cu transformer, e impacto fuerte a kibra e palo bente abou, lagando wayanan di coriente benta riba caminda.
Despues cu e auto kibra e palo di lus y cu e wayanan di coriente tabata benta abou e chauffeur a reverse cu su auto y cu e intencion di bandona e sitio, pero no a yega mucho leu.
Polis a yega na e sitio, mesora a nota cu e chauffeur ta basta bou influencia, Polis a detene e chauffeur pa core auto bou influencia y na trata na hit and run.
Transportwagen di polis a transport’e pa Warda di Polis na Shaba. Mientras e auto a keda confisca pa mas investigacion. Persona di Elmar na turno a wordo pidi na e sitio.
E impacto fuerte a pone cu un gran parti di e area di Noord, Washington, Keito, Bubali, San Miguel, Koyari etc a keda pa basta rato sin coriente, strobando e habitantenan di nan soño. Personal di NV. Elmar a yega hopi liher na e sitio y pa asina cuminsa drecha e palo di lus cu transformer aki y tambe pa a reestablece coriente den e area aki mas liher cu ta posibel.
