Recientemente mi a tuma nota di menasanan expresa via medionan di comunicacion contra Minister-President y su famia, Minister di Justicia y Asuntonan Social y Minister di Labor, Energia y Integracion door di un ciudadano. E hecho cu menasanan contra ministernan y nan famia ta aumenta y ta ser permiti “air-time” pa vocifera menasa – sin ningun obhecion di e media concerni – ta preocupante.
Medionan di comunicacion como tambe ciudadanonan tin libertad di expresion, pero esey no kiermen “free for all”. Menasa en general, pero particularmente contra mandatarionan di Pais Aruba ta inaceptabel y por formenta un sentimento di odio den comunidad cual por ta sumamente peligroso.
E ley actual di telecomunicacion ta data di aña 1908. Anticua pa e sociedad moderno. Den 2022 e ley aki lo wordo reemplasa pa uno cu ta ofrece Dienst Telecomunictie Zaken (“DTZ’) como regulador di telecomunicacion instrumentonan necesario pa actua contra e desaroyo preocupante aki.
Un instrumento cu lo wordo introduci pa radio emisoranan ta un sistema di delay como tambe un registro di e yamadanan. E articulo ya ta hinca den e permiso di radio, pero den aña 2022 e maneho lo wordo introduci. E sistema aki ta haci posibel cu durante 6 seconde e presentador di e programa ta scucha si tin palabranan ofensivo prome cu mande den aire. Ademas mester registra nomber y number di telefon di tur e yamadanan ricibi como tambe dia y ora di transmision di e programa.
Den 2022 lo introduci un ley di media unda lo establece normanan nobo den e contexto di medionan di comunicacion, incluyendo disposicionan cu ta conduci na un codigo publicitario y un codigo di conducta periodistico. Lo institui un conseho di media cu tarea pa entre otro conseha minister, prensa, informa y mantene su mes al dia cu e desaroyonan internacional, elabora un codigo publicitario y codigo di conducta periodistico y atende keho over mensahenan publicitario y conducta periodistico.
Introducion di ley di telecomunicacion y media lo eleva e nivel di hiba periodismo cual na final ta na bienestar y desaroyo di pais Aruba.