Home Local Esunnan cu a habri Aruba Marriott Resort mas di 26 aña pasa:...

Esunnan cu a habri Aruba Marriott Resort mas di 26 aña pasa: Empleadonan a traha e fundeshi di servicio di calidad den turismo

SHARE

 

 

ORANJESTAD, Aruba 23 di december 2022: Henter e siman aki, Aruba Marriott Resort & Stellaris Casino a dedica atencion na su empleadonan cu hunto a construi e fundeshi y e formula di exito cu a hiba e hotel na no menos cu 25+ aña di exito y crecemento. Di un hotel, e compania a kere den e mercado di Aruba y a sigui innova, crece y desaroya mas hotel pa nos isla. Awe e compleho ta un di esunnan mas grandi den Latino America y Caribe. Pero e exito no ta solamente e edificio, mara na e inversionnan multimiyonario, sino principalmente na e recurso humano cu ta traduci den un servicio sin igual na e huespednan.

 

No ta facil pa mantene un cantidad asina grandi di empleado cu a habri e facilidad na aña 1995 y cu ta trahando keto bay awe pa e mesun compania. Ta interesante tambe pa señala cu un gran parti di e empleadonan aki, a demostra compromiso y interes den sigui crece hunto cu e compania y awe ta forma parti di e ekipo di maneho cu responsabilidad pa traspasa nan conocemento y experencia na e hobennan cu nan ta contagia cu e mesun positivismo y nivel halto di servicio.

 

Humphrey Frolijk tin un funcion crucial den Stellaris Casino den e ekipo conoci como e “Casino Support”. Den e mas di 26 añanan cu a transcuri, el a siña hopi, a crece hunto cu e compania y a gosa masha di e benericionan cu trahando na Marriott e tin. El a conta di biahenan cu el a haci den pasado pagando tarifanan super economico p’e y su famia. Asina el a logra cera conoci cu varios otro hotel rond mundo. Awo mes, pa su 26 añanan di servicio y lealtad, Marriott a regal’e un estadia gratis di tres dia na tur su hotelnan. E ta considera esaki un estimulo pa sigui sostene y carga e compania pa hopi aña mas.

 

Charles Wagner awendia ta un Sr. Sous Chef den cushina na Aruba Marriott Resort & Stellaris Casino. El a conta cu trabou den hotel no ta facil, pero e satisfaccion di mas grandi ta ora cu e turistanan ta regresa tur aña y ta puntra pa bo. E ta yena bo dia cu alegria di sa cu e huespednan ta aprecia tur locual ta haci pa nan durante nan vakantie na Aruba. El a finalisa bisando cu el a gana hopi experencia y a conoce hopi hende diferente.

 

Juliana Hernandez Geerman, Grounds Manager na Aruba Marriott Resort & Stellaris Casino a sigura cu esaki ta su prome cas y unda e ta biba cu su famia ta su di dos cas. El a splica cu traha na un hotel grandi manera Marriott ta bin cu su “challenge” nan, pero bo ta siña di dje. A enfatisa cu cambio semper ta bon y positivo, ta keda na cada individuo pa haci bon uzo y siña di tur experencia di bida y den trabou. “Mi no tin suficiente palabra pa gradici Marriott”, asina e empleada cu a habri e hotel na aña 1995 a bisa para den un di e hardinnan di mas bunita di e resort.

 

Empleadonan fiel na Aruba

E compania ta considera e grupo di 113 empleado, cu a habri e hotel dia 31 di augustus 1995 y cu ta trahando te awe, como nan “charter team”. Na mundo, ora revisa tur e propiedadnan di Marriott, sin duda cu Aruba tin un di e nivelnan di mas halto di trahadonan fiel cu a keda cu e compania desde su apertura. No ta un desaroyo normal, pues e ta bisa algo di e forma con e compania ta trata su empleadonan, e compromiso cu e tin cu nan pa nan bienestar, progreso, educacion y crecemento den e compania. Charter Team di un compania ta e prome ekipo, cu normalmente ta esun cu ta habri e caminda, explora e miho forma di traha, crea protocolnan interno cu despues di 25 aña ainda ta vigente y ta percura pa un servicio sin igual, cu ta sigui atrae huesped pa e hotel.

 

Tocante Marriott Aruba

Aruba Marriott Resort & Stellaris Casino a habri dia 31 di augustus 1995 cu 411 camber y despues a añadi 3 camber mas na aña 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. En total, e famia di Aruba Marriott & Stellaris Casino ta consisti di mas o menos 1200 empleado den servicio directo. E compleho di Aruba Marriott & Stellaris Casino ta esun di mas grandi den henter Caribe, tanto den cantidad di camber como den cantidad di empleado.