Home Politics Trabou preparatorio a wordo haci riba nivel ‘ambtelijk’ pa COHO y ainda...

Trabou preparatorio a wordo haci riba nivel ‘ambtelijk’ pa COHO y ainda falta decision riba nivel ‘bestuurlijk’ di mandatario

SHARE

Gobierno ta duna splicacion riba e ponencianan di sindicato basa riba e splicacion cu Secretario di Estado Knops a duna na final di Conseho di Minister di Reino di 17 december 202

 

ORANJESTAD – Den un comunicado di prensa, 11 Sindicato y 2 Organisacion a duna nan reaccion riba e resultado di e reunion di Conseho di Minister di Reino di 17 di december 2021. Na final di e reunion Secretario di Estado Knops a duna un declaracion y a splica riba e resultado di e reunion pa Aruba. Basa riba e declaracion aki, 11 Sindicato y 2 Organisacion a formula nan opinion y a saca 3 conclusion. Den e articulo aki Gobierno ta brinda splicacion riba e di dos ponencia.

Segun sindicato: 

Aruba y Hulanda lo a yega na un acuerdo riba  ‘Ambtelijk niveau’ riba COHO dia 2 december 2021 y segun Hulanda cu awor gobierno no firma esaki.

 

Splicacion Gobierno:

Pa locual ta e trayecto di landspakket Aruba a cumpli grandemente cu e agenda cu a acorda entre Hulanda y Aruba. Esaki ta refleha tambe den reportahe di esaki door di COHO. Hulanda continuamente a pone como condicion pa sosten di likidez pa paisnan traha den forma constructivo riba e trayecto di COHO, locual Aruba semper a haci. Ta na delaster momento ora ta trata e condicionnan pa haya e di 8 tranche di sosten di likidez, Hulanda a pone como condicion adicional pa Aruba firma un protocol pa prolonga e supervision financiero di CAFT hunto cu e normanan den e protocol di aña 2018, sin cu esaki tin un ‘einddatum.’ E condicion aki no a wordo palabra entre Hulanda y Aruba y di un dia pa otro a wordo imponi como condicion pa Hulanda. Aruba a indica cu nos no por bay di acuerdo pa firma e protocol, ya cu Parlamento no a wordo consulta riba esaki. Bayendo di acuerdo ‘zomaar,’ lo a bypass Parlamento di Aruba. A splica Hulanda cu locual cu nan kier forsa Aruba pa haci pa haya e sosten di likidez pa e di 8 tranche ta contra nos Constitucion y pesey Gobierno di Aruba no por firma.

Riba e topico aki ta bon pa informa cu for di augustus caba riba nivel ‘ambtelijk’ (profesionalnan di Gobierno) y ‘bestuurlijk’ (mandatario) a aproba e texto general di e Ley di COHO. Locual tabata falta tabata un Nota di Cambio. Dia 2 di december e ‘ambtelijk team’ di Aruba a acorda pa presenta un Nota di Cambio pa e ley di COHO na nivel di mandatario (nivel di ‘bestuur’ ) pa esaki por wordo trata riba e nivel aki. Concretamente esaki kiermeen cu na nivel di Minister President di Aruba y e Secretario di Estado Hulandes mester yega na un acuerdo. Ta ora cu 

 

decision wordo tuma na nivel di ‘bestuur,’ ta e ora ey bo tin un acuerdo. Ora ta indica cu ‘ambtelijk’ a yega na otro, esey kiermeen cu e trabou preparatorio haci pa e ‘ambtelijk team’ pa facilita e mandatario su decision, a wordo haci y ta cla. Ta te ora e mandatario dicidi, tin un decision concreto cu por actua riba dje. Esaki ta algo cu Hulanda sa y pesey ta lamentabel cu no ta trece esaki ora di duna splicacion riba e sosten di likidez.

Na januari lo resumi e conbersacion entre Hulanda y Aruba riba e topico aki y nos tin confiansa cu lo yega na un solucion. E team ‘ambtelijk’ y ‘bestuurlijk’ di Aruba a traha na un manera profesional y diligente riba e ley di COHO.

 

Conclusion:

Trabou preparatorio a wordo haci riba nivel ‘ambtelijk’ pa COHO y ainda falta decision riba nivel ‘bestuurlijk’ di mandatario. Pues ainda no ta e momento pa Gobierno firma.