Home Politics Gobierno ta duna splicacion riba e ponencianan di sindicato basa riba e...

Gobierno ta duna splicacion riba e ponencianan di sindicato basa riba e splicacion cu Secretario di Estado Knops a duna na final di Conseho di Minister di Reino di 17 december 2021

SHARE

 

Hulanda a pone un condicion extra cu Aruba no por cumpli cune sin consulta prome cu Parlamento

 

ORANJESTAD – Den un comunicado di prensa, 11 Sindicato y 2 Organisacion a duna nan reaccion riba e resultado di e reunion di Conseho di Minister di Reino di 17 di december 2021. Na final di e reunion Secretario di Estado Knops a duna un declaracion y a splica riba e resultado di e reunion pa Aruba. Basa riba e declaracion aki, 11 Sindicato y 2 Organisacion a formula nan opinion y a saca 3 conclusion. Den e articulo aki Gobierno ta brinda splicacion riba e promer ponencia.

 

Segun sindicato: 

Hulanda ta bisa cu Aruba no a cumpli cu e palabracionnan y condicionnan. 

 

Splicacion Gobierno: 

Durante ultimo luna e ekipo di profesional di Aruba a traha incansablemente pa asina logra cumpli cu tur condicion stipula conforme palabracion entre Hulanda y Aruba pa haya sosten di likidez di Hulanda. Locual a pasa ta cu diripiente Hulanda a pone un condicion nobo pa Aruba por haya sosten di likidez pa e di 8 tranche pa e prome kwartaal di aña 2022. Como condicion extra a inclui e continuacion di e protocol di supervision di aña 2018. E protocol ta yega na su fin na final di aña 2021 y pa no perde e base y normanan pa e supervision financiero, Hulanda a bin cu e condicion extra aki sin cu e tabata palabra prome. No obtante cu esaki a bira un condicion ‘last minute,’ toch Aruba a drenta deliberacion riba e prolongacion di e protocol di supervision pa purba sali afo pa por logra haya e sosten di likidez di Hulanda. E motibo cu no a yega na otro ta, pasobra Hulanda kier pa Aruba acepta prolongacion di supervision financiero sin un fecha di vencimento, pues sin un ‘einddatum.’ Esaki no ta algo usual y ademas Gobierno no por bay firma, sin cu a splica y consulta prome cu Parlamento di Aruba. Mientras tanto Gobierno a manda pidi Raad van Advies un conseho riba e prolongacion di e protocol sin un ‘einddatum’ pa asina por purba sali di e  impasse cu a surti aki entre Hulanda y Aruba.

 

Conclusion:

Gobierno a traha pa por cumpli cu tur condicion necesario pa haya e sosten di likidez pa e di 8 tranche, pero Hulanda a bin cu un condicion extra cu no por cumpli cune sin consulta cu Parlamento promer.