Home » Prome reaccion di AVP riba fayecemento di Digna Laclé Herera “ETICA Y DECENCIA DEN Y PAFO DI POLITICA A CARACTERISA SU BIDA”

Prome reaccion di AVP riba fayecemento di Digna Laclé Herera “ETICA Y DECENCIA DEN Y PAFO DI POLITICA A CARACTERISA SU BIDA”

by Admin
0 comment 173 views

 

 

Na e bunita edad di 96 aña sra. Digna Laclé-Herera a fayece. Pa hopi decada señora Digna Laclé-Herera a sirbi como educador, poëta, consehero y ciudadano ehemplar den masha hopi sentido. E no ta un persona cu tabata busca publicidad. Al contrario, den tur silencio y privacidad ela educa, siña, conseha y guia hoben y adulto. 

 

POLITICA

Sra. Digna Laclé-Herera a drenta politica na e momento cu nos pais tabata tin mester di un direccion nobo, pa renoba nos pais, nos economia, nos enseñansa y renoba e forma cu tabata hiba politica na Aruba. Su contribucion no tabata solamente den e loke e tabata scirbi y bisa, pero tambe den e forma cu e tabata biba y hiba politica como miembro di partido AVP den y pafo di Parlamento di Aruba. Ta pa e ehempel cu ela duna cu su propio comportacion y trabou, cu partido AVP a crea e Fundacion Digna Laclé-Herera pa formacion politico. Den transcurso di añanan, politiconan di diferente partido a sigui cursonan organisa door di e fundacion aki na Cas di Partido. Te awe, e bida y trabou di sra. Digna Laclé-Herera ta sigui inspira y forma un guia pa politiconan na Aruba. Un di e expresionnan cu sra. Digna Laclé-Herera a uza hopi ta: “No djis bisa loke Bo kier haci. Haci loke Bo ta bisa.”

 

Partido AVP ta di luto

Den un prome reaccion lider di AVP mr. Mike Eman a corda ken sra. Digna Laclé-Herera ta y cuanto ela contribui na nos pais. Mike Eman: “Cu hopi dolor combina cu recuerdonan di admiracion y respet profundo nos ta biba e noticia conmovedor cu un gran dama a bai laga nos: Digna Lacle-Herrera. Un dama masha stima, respeta y hopi conoci den comunidad pa e maestra cu e tabata, su poesianan bunita, pa a yuda hopi hoben cu awe ta adultonan responsabel y pa e politica recto cu semper el a hiba. Un troncon di miembro di Parlamento. Etica y decensia a marca su bida y trajectoria. Normanan y valornan grandi na cual Partido AVP a dedica un Fundacion, Digna Lacle Herrera pa forma sirbidornan nobo pa Aruba a base di su inspiracion. Un hende cu nunca a riña pa bisa e cos manera e ta, para pa su principionan y opinion. Nos ta bai haya hopi falta di Digna. Hopi forza na su famia y e comunidad di Aruba cu tanto a stime manera nos. Cu nos Creador dune un lugar bunita di sosiego pa e personahe recto y special cu e tabata.“

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio