Home » Parlamentario Shailiny Tromp-Lee (MEP): Nada cu Gobierno, WEB of Eagle LNG a y lo duna na informacion nunca lo ta suficiente pa oposicion. Integridad, independencia y profesionalismo di nos expertonan a y ta keda cuestiona pa oposicion

Parlamentario Shailiny Tromp-Lee (MEP): Nada cu Gobierno, WEB of Eagle LNG a y lo duna na informacion nunca lo ta suficiente pa oposicion. Integridad, independencia y profesionalismo di nos expertonan a y ta keda cuestiona pa oposicion

by Admin
0 comment 75 views

 

 

Desde juni 2020 Gobierno di Aruba a inicia un proceso pa busca operadornan pa e refineria y otro desaroyo riba e tereno di refineria. Meta mas cu claro ta pa crea cupo di empleo y trece inversion y placa pa gobierno. 

 

E proceso aki tabata totalmente transparente y sin metemento politico. Durante e reunion y encuentro publico di dialuna y diamars ultimo un biaha mas nos Minister President a elabora extensamente riba esaki. Manera ya ta conoci Gobierno a scoge pa un destaho publico basa riba principionan di World Trade Organization. Un comision independiente a haci e seleccion. Miembronan di e comision aki ta: Chairman R. Arends, International Oil & Gas Expert dr. K. Gobert, Local Refinery Expert E. Oduber, Legal Counselor M. Brown, Economic/Financial Expert J. Briceño y HSE Expert R. Leonora. Personan profesional y experencia cu t’esnan cu a percura pa e proceso. Ta un lastima cu oposicion durante reunion a cuestiona nan integridad, independencia y profesionalismo. Na mi opinion asina Aruba sigur no lo por sigui progresa, paso nos mes ta rebaha y caba cu nos profesionalnan pa beneficion politico. Den e encuentro publico por a haci tur pregunta dirigi na e exportonan di WEB, EAGLE LNG y RDA/Comision y realidad ta cu a keda demostra cu no tabatin echt interes den esaki y cu si a haci pregunta mes y a haya contesta toch ta sigui cuestiona sin base.

 

De corto mi kier repasa e informacion ricibi di Gobierno pa loke ta trata e proceso. Pasobra ta bon pa pueblo sa cu a trata mas cu 100 propuestanan y 48 a pasa pa Fase 1. A evaluanan riba e aspecto industrial/tecnico, economico, medio ambiente, salud, seguridad y finalmente compliance y e parti legal. A pasa proceduranan di screening, asisti pa gobierno mericano y 17 a pasa pa Fase 2. Cu esakinan a drenta combersacion y a pidi nan entrega un ‘binding offer’. A base di esakinan e comision independiente a informa Gobierno cu nan ta recomenda dos compania: Quanten pa e refineria y Eagle LNG pa otro desaroyo cu por contribui substancialmente na desaroyo di nos economia. Na december 2020 a firma un declaracion cu Eagle y Quanten. 

 

Despues di esey a sigui negosacionnan y RdA a informa WEB cu awor nan ta bendiendo WEB HFO pa genera energia, y nan ta bay transiciona pa bende WEB gas pa genera energia. WEB di su banda ya pa mas di 10 aña pasa tabata kier a transiciona pa gas. Nan a haci hopi hopi estudio, paga miyones na consultancy y hasta a haya aprobacion di gobierno di signatura berde na december 2016 pa esaki. E tempo ey gobierno di AVP tabata forsa nan bay cu GasUnie. Pero WEB no kier a deal cu GasUnie pasobra e prijs no ta combini WEB. WEB a sigui busca y e dos proceso di buskeda aki a keda sincronisa e aña aki. Den 2021 WEB RdA y Eagle a negocia con por yega na un mihor deal posibel pa WEB. Y asina a yega cu WEB a firma cu Eagle. 

 

E deal aki tin hopi beneficio pa WEB y pa Aruba. Entre otro ta scapa WEB $20-30 miyon pa aña na gasto di fuel, ta scapa WEB mucho mas na gasto di operacion y mantencion, ta genera energia mas limpi, na un prijs mas stabil, ta genera un desaroyo economico nobo, cu inversion di $100-$150 miyon, lo genera cupo di empleo, LNG ta mucho mas mihor pa medio ambiente y ta pone cu Aruba por cumpli cu tratadonan internacional di baha emision di CO2 y cumpli cu nos parti na combati global warming.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio