Olijfistraat – Diasabra anochi algo prome cu 10’or patruya di Playa a spot un Honda Pilot busca pa Husticia. Tawata trata di un di e rumannan Williams.
Patruya mesora a sigui e auto y esaki lo a hisa velocidad bay direccion Olijfistraat, unda nan ta drenta Olijfistraat 22 cu ta cas di nan famia.
Den algun minuut un cantidad grandi di polisnan di varios districto a yega, entrenan K9 Unit y tambe team di aresto.
E cas a wordo rondona pa polisnan, den Avenida Milo Croes tambe tawata polis para den caso si Nigel Williams purba huy.
Despues di basta rato Jose Dirks ex Presidente di Spa a yega como Hulp Officier van Justitie y a papia duro cu e famia.
E famia tawata bisa cu Nigel no ta biba eynan y e no ta eynan.
Dirks no a guli e storia ey y despues di algun minuut famia a dicidi di coopera. Polisnan a drenta hunto cu Hulp Officier van Justitie Dirks y ta sali cu Nigel Williams den boei.
E la wordo hinka den un patruya y transporta mesora pa un warda di polis.
E detencion a bin debi na un pelea entre yiu di Prome Minister y Nigel Williams y su ruman.
E pleito cu a bay for di man na Gusto y despues di Azia restaurant.
Eynan glas lo a wordo manda of ta kibra, unda cu un trahado a wordo corta door di glas y mester a bay Hospitaal. Segun informacion e luga a sufri basta daño debi na e pelea.
Despues di 14 di November Husticia tawata busca e rumannan Williams, y diasabra 18 di December 2021 Nigel Wiiams despues di mas cu 1 luna a wordo aresta na Olijfistraat 22 Dakota.
