Home Local AHATA ta preocupa pa posibel repiticion di alerta halto di CDC

AHATA ta preocupa pa posibel repiticion di alerta halto di CDC

SHARE

Oranjestad, AHATA ta mira e casonan di COVID a subi atrobe den ultimo dianan y e indicacion cu Aruba ta experienciando comienso di un ola nobo. Mientrastanto fiestanan di Pasco y Aña Nobo ta dilanti porta y cantidad di bishitantenan y famia di residente ta yegando Aruba pa vacacion. AHATA ta preocupa cu na Januari 2022 Aruba lo ta na nivel 4 di alerta di CDC atrobe, causando un impacto negativo riba nos economia y comunidad. 

 

Aña pasa nos a experiencia e efecto di e temporada na Januari, ora cu CDC na Merca a hisa e nivel di alerta di biahe pa Aruba pa motibo di e cantidad di casonan nobo cu Aruba a registra. Consecuencia tabata un cantidad di cancelacion di turista. Menos turista kiermen menos actividad economico pa genera entrada pa nos tur na Aruba.  

 

Mientras cu Aruba tin un bon programa di vacuna, e sistema estricto cu CDC ta usa pa su alerta di biahe ta basa riba cantidad di caso nobo, y no tin relacion cu severidad di e casonan. Cu e patronchi actual di casonan nobo y un posibel escalacion di caso despues di temporada di fiesta, Aruba tin e peliger di ricibi nivel 4 di alerta atrobe na Januari. Un nivel di alerta 4 ta causa perdida grandi di reservacion di turista na hotel, cas y apartamento. Ademas nos por perde vuelonan cu ta planea pa bin Aruba di Merca.  Cu menos turista tin menos entrada pa Aruba su comunidad. 

 

AHATA ta realisa cu tin hopi diferencia di opinion den comercio relaciona cu medida pa mitiga cantidad di caso di COVID, pero ta enfatisa cu ta importante pa proteha nos economia pa e lunanan di high season (Januari y Februari) y no pensa riba Pasco y Aña Nobo so. 

 

Pa tal motibo AHATA ta spera cu Aruba lo mantene y introduci medidanan cu ta yuda mitiga un ola di COVID, por ehempel:  restriccion di cantidad di persona na encuentro social, exigi vacuna of test pa encuentro social, y rekesito pa ta sinta na mesa den establecimiento. Tur medida mester ta acompaña pa control di autoridad. AHATA ta pidi Aruba su Crisis Team y autoridadnan pa tuma decisionnan necesario pa proteha economia den prome kwartaal di 2022 pa por garantisa continuacion di recuperacion, entrada pa nos comunidad, y entrada pa nos gobierno. Mientrastanto, AHATA ta apoya escalacion di programa di vacuna y booster, y ta pidi nos comunidad pa sigui cuida nan mes y nan sernan keri.