Dia 22 di december ta haci 11 aña, cu John Anthony Castro, mihor conoci como Poentje Castro a wordo asesina den su cura di cas, porfin Husticia pa Poentje Castro a cuminsa mira lus di dia.
Un caso di asesinato cu a dura mas di 10 aña pa por a detene e prome sospechoso. E caso Apollo/ Asesinato di Poentje Castro a cuminsa den corte, contra e sospechoso principal Anderson Rasmijn. Un caso cu sigur lo bay dura basta prome cu sentencia lo cay. No ta descarta e posibilidad cu durante tratamento di e caso lo por detene mas sospechoso. Cu husticia prevalece den e caso grandi aki.
Oranjestad:
Diabierna den oranan di merdia, e sospechoso principal Anderson Rasmijn, naci na Colombia na aña 1986, mester a presenta den corte. E sospechoso Rasmijn ta wordo acusa di a tira John Anthony Castro mata, riba 22 di december 2010. Famia di Poentje Castro tabata presente den sala di Corte.
Hues a bisa cu ainda e procesverbaal oficial di recherche no ta cla. Abogado mr. Carlo a bisa Hues cu a pidi pa un psykiater determina si Rasmijn ta compronde kiko ta e acusacionnan contra su persona. E abogado a bisa cu tin un peticion pa haci e investigacion aki y pa Corte nombra un psychiater pa haci’e. Hues a bisa cu mientras tanto ya caba a nombra un psychiater, esaki a sosode riba 15 di december 2021, kende lo bay investiga e sospechoso principal.
Fiscal a bisa cu tanten cu e investigacion di psykiater ta andando no por para esaki. E la mustra cu na Hulanda tabata tin un caso unda a sigui cu e investigacion te ora cu e raport di psychiater a keda cla, pa a tuma un desicion. Den e caso aki, fiscal ta kere cu lo mester sigui cu e mesun procedura, mientras cu e investigacion di psykiater ta andando, Rasmijn lo keda cera y e desicion final lo depende di e resultado di e raport psykiatrico. Hues na su turno a puntra cuanto tempo esaki lo por bay dura. Fiscal a bisa cu e no ta sigur, Hues a bisa cu despues di dos luna.
Fiscal a bisa cu mester di basta tempo pa trata e caso aki. Lo bay tuma por ta full un mainta y a propone pa haci esaki riba 25 di maart 2022 y teniendo na cuenta cu e investigacion.
Hues lo mester manda e caso pa Hues Comisario pa asina e deseo di abogado mr. Carlo wordo realisa. Asina e psykiater no tin ningun duda kiko lo mester wordo haci. Hues a puntra si e caso e dia ey lo ta proforma. Fiscal a splica cu e kier reserva e fecha pa si no keda cla cu e investigacion, por usa e fecha aki un biaha mas como proforma.
Abogado mr. Carlo a mustra cu su cliente a bisa cu relaciona cu e caso aki, su cliente a wordo interoga caba na 2011. E tempo ey tabata tin video caba y nada a sali. E la bisa cu e ta haya masha straño mes, cu apenas e la wordo apunta como abogado defensor, ya prensa local a yam’e, ta mustra cu for di April 2021 Ministerio Publico a habri e investigacion aki. E la remarca cu e procesverbaal ta data di 2011. E unico cos cu a bin acerca ta e declaracion di Gonzales Morales.
E abogado a cuestiona awe den corte cu un media local a influencia e caso. E ta haya cu e caso aki ta wordo influencia door di prensa. Fiscal a bisa cu tin libertad di prensa y ta keda na cada un pa publica algo. E la sigui bisa cu prensa ta influencia e caso, pasobra 10 aña largo no a tende nada di e caso y comunidad kier sa kiko a sosode. Tambe e la sigui bisa cu ni fiscal, ni hues, ni abogado por haci algo contra esaki.
Hues na su turno a bisa cu tin suficiente indicacion cu Rasmijn ta envolvi. Segun Hues tin un video caminda ta mira Rasmijn core bay for di e cas y cu un saco den su poder.
Hues a haya cu na interes di e investigacion pa pospone e caso pa 25 di maart mainta di 8’or y mey pa 12’or. Tambe pa manda e caso bek pa Hues Comisario pa laga e psychiater haci e investigacion necesario riba Rasmijn.